早前提到營幕嘅基本spec，今次就講營嘅種類。先要分4類: 充氣式、自動式、搭建式、速開式。
以搭建方式劃分營幕
1. 充氣式 Inflatable Tent
無營骨嘅設計，只需要充氣就可以使用，因考慮到安全性問題，所以一般都會用到重及厚嘅物料，收納同展開都相當大，所以非主流。
2. 自動液壓式 Hydraulic Pop-Up Tent
----- 廣告 Ad -----
雨傘般設計，一開一閂都非常方便，不過因為關節太多，壞嘅機會自動會提高，亦因為關節太多，收納非常大舊。同時無乜公司投放資源去改良，所以通常弱不禁風。
3. 速開式 Pop-Up Tent
幼鐵枝扭曲設計，一打開就會自動成營，因要鐵枝要幼到能扭曲關係，所以相當受唔起考驗，布料亦不能太重，否則鐵枝未得支撐，當玩具好了。
4. 搭建式
用營骨/營柱做支撐配合布料搭建而成嘅設計，最常見嘅類種。穩唔穩陣就要睇營嘅物料、布料等，詳情可以參考: 布料知識
以上4種係指搭建方式，但一隻營安唔安全，都要睇佢嘅外形設計嘅，而營又有分。
以外形劃分營幕
1. 人(A)字營 Ridge Tent
三角朱古力咁嘅形狀，用兩枝 pole 去支撐，再用營繩拉好搭建而成，屬 non-freestand 形。經典設計，單層營居多，所以比較輕身但抗風力同跣水力都唔係特別好，為咗避免食風，一般都比較矮身，同時因搭建時需要固地點多，所以對地形限制比較大，
2. 蒙古包 Dome Tent
頂圓加底部四方/長方咁嘅形狀，用2~4支骨交叉搭建而成，屬 freestand 形。流線形嘅外形方便跣水同抗風，而圓頂嘅設計更可以抵抗唔同風向嘅風，搭建快又方便，可惜 tent pole 有啲多及長，收納會比較大舊。
----- 廣告 Ad -----
3. 魚骨營
外形比較難分，但 tent pole 係採用「單Y」or「雙Y」搭建而成，同屬 freestand 形，改善咗蒙古包嘅 tent pole 問題，而搭建同樣快且方便，收納更細更輕，但犧牲咗空間同抗風力，雖然係咁，依然係主流類型。
4. 金字塔 Pyramid Tent
外形就係金字搭形狀，用一枝 pole 及足夠營釘搭建而成，屬 non-freestand 形。金字塔嘅外形可以提高缷風及跌水能力，搭建就比較需要經驗，中間枝 pole 又阻手阻腳 (雖然有方法去除)，收納雖然細及輕，但需要配備其他裝備如: 內帳、行山 pole 等，固定點又多，令人又愛又恨。
5. 單圈式營
外表似太空倉嘅形狀，用一枝彎曲嘅 tent pole 配搭營繩搭建而成，屬 non-freestand 形，單圈式營非常之輕，收納又細，但換來比較難搭建同需營繩比較多，另外要靠布料本身去抗風雨，唔建議新手用。
6. 隧道營 Tunnel Tent
外表一睇就知叫隧道嘅形狀，用多個彎曲 tent pole 配搭營繩搭建而成，屬 non-freestand 形，輕得黎相當大空間感，但横風係硬食，加上要勁多固定點，搭建時要留意返地形風向。
7. 「測地線」營 Geodesic tent
中文都唔知叫咩，照翻譯做測地線，外表有啲似蒙古包但明顯多幾條交叉 pole，屬 freestand 形，真正極地用，所以多數都係4季營，交叉 pole 設計令到成隻營安全度增加，但同時又會增加重量，不過去到極地，安全性重要好多! mountaineer 必備!
其他仲有如: 雙尖、部落營、家庭營、馬戲團等。但通常用於 glamping，所以注意事項比較少，有機會先再繼續。
