Fitz > 運動 Sports > 行山 Hiking > 露營 Camping > 韓國大媽露營短片可製造「顱內高潮」(ASMR) ?

故事由今年8月韓國首爾嘅暴雨講起。今年夏天,韓國受暴雨侵襲,首爾地區降雨量更打破115年紀錄,上圖呢張首爾市中心圖片令災難圖像化,全世界都知韓國呢場雨落得有幾勁。

就喺呢個時候,筆者嘅 Youtube account 突然推薦好幾條韓國大媽露營短片 (估計係我喺 Google 搵過韓國暴雨資料,以及我有睇營露短片習慣)。原來唔少韓國 Youtuber 都趁住落大雨,蜂湧走去露營拍片,為咗係將短片加上「ASMR」元素,令短片可以更廣傳。

咁咩係 ASMR? 同露營有咩關係?

ASMR 與「大腦高潮」

ASMR 全稱係 Autonomous Sensory Meridian Response,中文譯做「自主性感官經絡反應」,有人稱之為「顱內高潮」或「大腦高潮」。簡單講就係藉著刺激聽覺、視覺、觸覺等感官系統,令身體產生異常愉悅嘅感覺,達致減輕精神壓力嘅目的。有研究話,某些視訊短片可透過以下聲音,就會產生 ASMR 嘅效果:

  • 大自然產生嘅聲音,如雨聲、風聲、雀鳥叫聲
  • 飲食嘅咀嚼聲
  • 步行聲
  • 細聲講嘢
  • 吹氣聲

韓國 Youtuber 之所以對 ASMR 短片樂此不疲,係因為有幾位打正旗號拍攝 ASMR 短片嘅韓國 Youtuber 極受歡迎,ASMR Suna 꿀꿀선아 訂閱戶超過180萬,呢條16分鐘嘅短片達到1,300萬觀看人次。

露營大媽與「顱內高潮」

筆者斷斷續續睇咗接近100條韓國大媽露營短片,每條短片多則半小時,少則15分鐘,基本上都係相同情節:

出發 > 到達 > 搭營 > 休息 (飲酒) > 生火煮飯 > 食飯 + 飲酒 > 生火煮飯 > 食飯 + 飲酒 > 休息 (飲酒) > 生火煮飯 > 食宵夜 + 飲酒 > 瞓覺 > 天光起身 > 沖咖啡 (要手磨咖啡) > 飲咖啡 + 思考人生 > 煮早餐 > 食早餐 > 收營 > 走人離開

可以睇到,大媽露營都係飲飲食食為主,短片大量食嘢同飲酒嘅情節,就算有對白都係細細聲同你耳語,再加上如果再配合埋落雨嘅聲音,就絕對符合 ASMR 原則。

韓國露營短片最多飲飲食食

咁大媽嘅飲酒嘆氣聲、食嘢嘅咀嚼聲,係咪可以激發我嘅「顱內高潮」呢? 其實我都唔知,我剩係知周不時睇呢啲短片睇到瞓著覺。

4大韓國露營女 Youtuber

先旨聲明,我無刻意去搵一啲好受歡迎嘅 Youtube片嚟睇,以下呢幾位都係由 Youtube 推薦,大家有乜好嘢不妨留言話我知。為免令人覺得我有性別歧視,男性露營 Youtuber 大多係裝備L,全片以介紹裝備為主,好多對白,並無 ASMR 元素。

씬미 (SSINMI) 8810訂閱

典型韓國大媽外表,亦有大媽做開家務嘅利落手勢。由搭營、劈柴生火,以至煮嘢食,相當駕輕就熟,爽爽快快,至少唔睇到你炆。衰在短片得韓文字幕,完全唔知佢講乜。

  • 露營方式: 汽車營地
  • 賣點: 煮嘢食,正宗韓國家常菜

기쟁니CAMPING  (gijaengni_camping) 3.3萬訂閱

以佢搭營、煮食嘅手法,應該係資深營友,鍾意大雨、大雪露營,亦會行下山。唔好寄望佢會煮大餐,短短地十幾分鐘一條片又幾舒服。

  • 露營方式: 車中泊、汽車營地、遠足露營
  • 賣點: 認識下韓國營地情況,睇人食下嘢飲下酒

조조캠핑 (jojo_camping) 33.6萬訂閱

走可愛路線,或者因為咁有超過33萬人訂閱。弱質纖纖嘅身型,擔又唔得抬又唔得,睇佢搭營煮飯劈柴,絕對睇到你發火。不過睇佢呢幾年嘅短片,裝備越來越大越齊備,部私家車又越來越豪華,而佢亦越來越熟手,見證到佢有所成長。

  • 露營方式: 車中泊、汽車營地
  • 賣點: 有隻狗睇下

빅바디 Bigbody 9.2萬訂閱

玩得好認真嘅露營友,搭巴士唔揸車,仲會磅下個背囊,介紹每次露營嘅裝備,可以滿足真係鍾意露營嘅朋友。而佢最大特點係好鍾意飲好鍾意食,每條片閒閒地食五餐 (兩日一夜),飲五罐啤酒一樽米酒一樽燒酒……

>

  • 露營方式: 公共交通 + 步行
  • 賣點: 飲飲食食、露營場介紹

同場加映: 貧窮限制了我的想像

上面講韓國男性 Youtuber 好多都係裝備L,佢哋嘅裝備真係打破我嘅想像。以上圖呢位先生為例,佢由部 Land Rover 以至大廳嗰張梳化+碌架床都相當講究,都無諗去露營可以咁識嘆。

其實去露營當然唔使咁豪,我估香港營友就算簡簡單單喺野外瞓晚已經好心滿意足,問題係香港嘅營地幾時會開返呢……

資料: 數位小幫手台灣聯合報


文章為作者意見,不代表Fitz立場。
歡迎投稿: http://fitz.hk/contribute/