當露營由 to see 變成為 be seen 活動時

我有一位愛認屎認屁的MK妹同事最鍾意曬IG露營相。嚴格來講，她似玩露營 gears 多過玩露營。由疫情爆發無得返鄉下到現在，她已經投資了近廿萬在gears上。其實，又有什麼出奇，一年返兩次鄉下，每次花五萬幾乎是最低消費啦! 所以，package 劉無L有錯的，都唔明點解大家要X佢。

我呢啲廢老舊時露營是 to see 想親親綠色的大自然，現在是be seen (喺IG和YouTube) 緊要過 to see。這種心態上的變化也帶來行為上的仆街化。

走時比來時好

我第一次露營是在中一當上童子軍時，地點是西貢鹽田梓。當時我最祟拜的學長春子偉是我的小隊隊長，也是我的人生教練。因為他超靚仔，媾女又叻，係連隔離街中學的校花都媾到的。

春子偉教導我們露營的第一守則就是「走時比來時好」。當離開營地時，他要求我們保持營地清潔、回復原貌不特止，更要清走原本有的垃圾，令營地比我們來之前更美麗。他又教我們製作焚火台和火箭爐，避免燒地。生火只可以用地上執到的柴枝。如果要砍樹，除非你可以種回兩棵，否則不可以破壞一草一木。

因為要止旅行癮，大家一窩蜂去露營，於是除夕昂平擠迫如阿富汗難民營。我見過一張塔門航拍相，小島萬家燈光，人多到一個點可以選村長。須知道香港地方細買樓貴，這情況是無可避免的，但當露營友抱著『嫖客』心態時，就會造成嚴重破壞。

喂，我係嚟消費 (大自然) 的。俾咗錢，乜唔係任砌嘅咩?

因為很多人有這種諗法，就會有中秋假期後東龍島、蒲台島漫山遍野垃圾、各個營地滿地狼籍，淪為垃圾崗。

就會有三更半夜仍製造嘈音，擾人清夢。當被要求將聲浪收細時，反而會窒返你轉頭「要靜就去圖書館啦! DLLM」。
就會有見到佢草地上生火，你上前勸阻時，佢會陀地上身凶你唔好咁多事。
就會有露營是一次性交易，把整個營連露營用品遺棄在山上，加起來達廿三十磅。
就會有吸煙後劉華咁chok把煙頭用中指彈入草叢。在郊外露營就是為了呼吸新鮮空氣，食乜L嘢煙呢?
就會有稱樹根絆倒人，露營友攜斧頭亂斬樹。
就會有露營後不清理垃圾，把營地弄得一團糟，缺德行為令下一手無法使用。

裝備提升了，公德心呢?

現在露營十分講究，兩日一夜伙食是四五千的 Omakase。如果個啲濕鳩露營 YouTuber 見到我當年童子軍考 camp cook 章煮的三餸一湯時，一定大嗌「WTF」、「人食架?」

營地烹飪徽章要求設計一小隊週末露營，包括早、午、晚三餐之菜單。午、晚餐為三餸一湯，以新鮮食物為主，包括魚、肉、蔬菜及蛋，早餐最少有一熱食。

我同拍檔煮了蕃茄炒蛋、蠔油薯仔炆雞翼、蒜蓉白菜仔和紅衫魚蕃茄薯仔湯。最搞嘢係春子偉規定我們只可以用三枝火柴生火起著個炭爐。第二日的早餐，我夾另一位隊友準備港式早餐，榨菜肉絲公仔麵配煎蛋或炒蛋餐肉多士。這位隊友花名叫「阿福」，叮噹入面個個，是一個富二代。平日有馬姐照顧，自理能力是零，所以我只吩咐他幫我開罐頭。

「X! 有無搞錯呀? 全部都淨係得榨菜無肉絲嘅，啲大陸罐頭呃錢嘅。」
「睇吓，你將啲空罐掉咗呀?」
「係呀。」
「X! 你真係唔識架喎。你只係開咗榨菜個面，下面個罐先至係肉絲呀，死蠢。」

但我們並沒有嫌棄他，因為他為我們提供笑料和資金購買露營裝備。我們由帆布帳篷升呢到尼龍帳篷、由雜貨舖的銻煲換成 coleman cookset 套鍋、添置了 gas爐和大光燈。但小隊中廟街十二少仍堅持孭幾十斤炭和瓦煲上山煲臘味煲仔飯，他的煲仔飯是好食到黐綫架。

而春子偉最拿手是煮意大利粉，signature dish 是意大利窮L恩物 Aglio e Olio。他會抄足意大利黑手黨電影裡的大佬一樣用刀片把蒜片切到好薄，薄到透光來煮橄欖油，讓蒜味更濃。俾佢見到我搣斷意粉來煮時，佢會即刻跳掣喪鬧人的。

當香港人露營跟日本人一樣越來越講究風格時，品格呢?

讓世界變得更美好

春子偉曾跟我們分享他的一位同樣是童子軍朋友的故事。當年他的童軍朋友正進行「總領袖獎章」的遠足項目。當行到船灣淡水湖以東、老虎窟後面的山徑時遇上一對外籍夫婦，帶着兩隻狗，由一名十分健碩中國人陪同行山。外籍夫婦好友善，並表示十分喜歡香港的郊野，好享受星期天行山這個時間。

傾談及休息過後，他的朋友和同伴與老夫婦說再見。離開後，他們才醒起對方就是時任港督伉儷。還有當時獎章正是由香港童軍的總領袖，即港督頒授，他與其同行友人的總領袖獎章，就是翌年由港督麥理浩手上接過來，因此這次相遇對他們來說可謂十分奇妙。

聽說港督麥理浩很少出席生日會、婚宴等應酬。工作以外，他熱愛行山，現在的麥理浩徑正正就是他愛遊走的山徑。由童子軍到現在成為一位廢老，我於麥理浩徑都留下不少珍貴回憶。

有些人離開後，會留下一個比他來之前更美好的世界。

做人係咁，露營都係一樣。