Fitz > 運動 Sports > 行山 Hiking > 露營 Camping > [老hike都去camp] 露營經驗分享 垃圾處理

經過五一黃金周嘅洗禮,一如以往,成個 FB 充斥住: 垃圾山頭、大媽掘蜆、斬樹等 post。當中塔門又一被山友垃圾攻陷,都需要講下,究竟山頭應該點處理垃圾。

1. 減少垃圾最佳方法就係減少垃圾源頭

出發先,盡量將膠袋或包裝紙除去,用密實袋或盒代替,並帶回家清洗留下次使用。

2. 請自備膠樽

好多人去到户外士多,總會買啲特色飲品如: 薑奶茶、洛神花茶、雞骨草等。如果大家自備膠樽,買時俾士多fill 或即場換樽,垃圾就唔駛拎上山頭,自然減少垃圾出現機會

3. 注意身上垃圾擺放

我知有啲垃圾唔係專登,而係唔小心拎野時跌出黎 or 勾到。請將身上物品有系統的擺放,例如:左邊褲頭袋係放垃圾,右邊放電話,咁就唔會因為拎電話導致垃圾跌出黎。

4. 盡可能縮細垃圾體積

膠樽可以扭,鐵罐可以踩,蛋盒可以剪細等。咁離開時,都只係得一袋垃圾,方便拎回市區。

5. 自己垃圾,自己帶走

好多人見到有户外垃圾桶,以為掉咗落去就當處理好。其實錯誤,因為户外垃圾唔係常常有人清理,一積咗喺度,就係牛牛等野外動物嘅飯堂,同時佢哋唔會識拆袋同 table manner,最後就食到成肚膠同成地垃圾,惹到成營地都係老鼠同蟻。最好都係自己拎返走,有能力帶上,就有能力拎走。

6. 食物殘餘

好多人誤解「自然分解」依個問題。係,橙皮等真係可以自然分解,但分解前,已經惹到一地蟻竇。另外食物殘餘用袋或樽入好,之後拎走吧,你都唔想下次去返同一個好位已經變蟻竇吧?

7. 垃圾打包

每次訓之前,垃圾都要 pack 好再掛高位,防止野生動物來襲。你都唔想第二朝一地垃圾啦?

最後,可能你會覺得,反正我都久唔久一次,變成點唔關我事。但事實,香港就係大家屋企,應該無人想自己屋企都係垃圾堆。

只要每人做多步,就可以保護到香港咁靚嘅地方。

香港人,加油!

老hike都去camp Facebook專頁


文章為作者意見,不代表Fitz立場。