[老hike都去camp] 露營經驗分享: 脫水餐

脫水餐即係將食物脫水處理，加水後就能回復原狀。

喺二戰時，美日兩軍都分別研究脫水技術，增加食物保存時間、方法，同時降低運送重量及損耗。去到70-80年代，脫水技術民用化，但因為技術未得成熟，營養流失大、口感差、價錢貴，所以未有普及。到依家，脫水飯已經平民化，技術都相對成熟，質素都有所提升。

脫水餐其實好簡單，只係將食物中水份抽乾，加水後就食得，最方便地方，係凍熱水均可，只係時間不一，所以好適合一啲hardcore玩法使用如: 極地攻頂、climbing、泳露、全走self support等。而香港露營因為距離短、補給易、要打卡等，所以都比較少人選擇脱水餐。

以下本老hike分享香港常見嘅脫水餐嘅食評

At chef

台灣製嘅中式脫水飯，有4種口味，仲有湯同糖水。

食評: 老實講，口感一般，湯淡而無味，份量偏少，一包只可以話餓唔死而已。

尾西alpha

日本製嘅日式脫水飯，有8種口味。

食評: 非常好味，份量唔算少，本老hike常用。

Travellunch

德國製的西式脫水餐，唔止有飯，仲有意粉、通粉、薯蓉、甜品等。

食評: 口味一般，不過飽肚感良好，對大食嘅人黎講，首選。

Muji

圖: Muji官網

日本製的日、西式脫水餐，有超過廿款嘅飯&湯選擇。

食評: 味道好，方便購買，份量一般，食完唔飽但又唔叫餓。

食脫水餐，基本上只係吸收卡路里同營養，唔好期望有飽肚感，同埋唔好當正餐食，始終營養價值無正餐咁好，放一包旁身就好了。

老hike都去camp Facebook專頁
老hike都去camp 網站