台灣消防員示範片段
最近露營群組有條大熱短片，講解香港常用嘅「邊爐氣」(台灣叫卡式瓦斯)如果胡亂改裝，可導致嚴重意外。
首先睇睇「邊爐氣」同「高山氣」嘅分別:
| 邊爐氣 | 高山氣 | |
| 擺放位置 | 瞓低 | 直立 |
| 氣閥 | 較簡單，輕按已可噴氣 | 較嚴格，只要與氣爐接好，就不怕氣體外泄 |
| 好處 | 價錢平 | 夠穩定，適合任何海拔及天氣 |
| 缺點 | 較大支、高山及極寒天氣不能燃點 | 價錢貴 |
邊爐氣嘅氣閥設計，係需要瞓低樽身先可以令氣體燃料釋出
高山氣氣閥
依照短片中嘅消防員所講，邊爐氣因為氣閥設計較為簡單，所以使用時一定要依足安全程序:
- 唔可以直立使用，要瞓低樽身先用得
- 將樽身放置適當位置，樽上嘅安全提示向上
- 煮食時唔好令氣樽過熱，例如唔好用太闊大嘅爐具
- 氣樽有破損，不要使用
使用邊爐氣時，呢條安全提示一定要向上
改爐搵命搏
市面有啲轉換器，可以將高山氣爐轉用邊爐氣。甚至有人將邊爐氣注入高山氣氣罐。呢啲改動都有機會令氣體外泄，相當危險。
某國網購平台有售嘅轉駁器
早前外國有營友測試爐頭，差啲燒傷自己。大家睇清楚，邊爐氣嘅樽身雖然瞓低，但無擺放適當位置 (安全提示無向上)，結果產生大火，差啲燒傷自己。
總之，露營郊遊都為咗放鬆身心，為咗慳少少錢要承受咁大風險，其實一啲都唔值得!
資料: Campfire 營火部落
朱溫
生於亂世，有種責任。這個責任就是做好自己，感染別人。鍛練好身體，才能裝備自己，迎接亂世。