湖南石牛寨景區有幅高280米嘅峭壁，有常設嘅攀岩活動，畀遊客一嚐攀爬體驗。遊客全程要爬1至2小時，為咗減輕遊客負擔，當局喺峭壁上開咗間「便利店」。
呢間「便利店」已開業一段日子，日前被航拍機拍攝並再次喺網上廣傳。「便利店」離地120米，面積只有2平方米，商店提供礦泉水、零食等簡單補給，亦可以借地方畀攀到攰嘅旅客休息。雖然「便利店」設於景區，不過睇價錢並無趁火打劫，一支礦泉水只係賣2蚊人仔，仲可以用支付寶畀錢。
有關方面聲稱，「便利店」用輕質建材興建，唔會破壞山體。但唔少人都覺得「便利店」已經破壞大自然景觀。
資料: 搜狐
