行山系列–大東山

  • 難度:
  • 長度:(約八公里)
  • 時間:約四小時(大量拍芒草時間)
  • 起點:東涌鐵路站〉巴士11或23號〉伯公坳
  • 終點:南山營地〉巴士3M號〉東涌鐵路站

路線特色 :
賞・包羅萬有,大東山除左係睇芒草既代名詞外,仲有好多靚野不容忽視!
有大量既宏偉巨石!

以sunset命名既山頂睇日落晚霞!

獨有而神秘的爛頭營小屋!

行一陣就可以飽覽既廣闊海景!

唯上落波幅大!為香港第3高山峰,務必衡量體力是否足夠!

宜:影芒草石頭愛好者睇日落日出影靚相情侶戀人未滿影山景追求開揚景色之人三五知己

忌:缺少運動之人怕曬之人


純文字攻略:

係東涌鐵路站集合,再去巴士站搭巴士11或23號,去到伯公坳站落車,正式出發!

  • 約2分鐘:見到一大涼亭,正式上山出發。
  • 約30分鐘:無路牌,右邊有小路去亂石堆,直去大路繼續上大東山。
  • 沿大路都會有d小路去到d巨石休息下,想上大東山只需沿大路一直上去。
  • 約1小時20分鐘:無路牌,左轉為上猩猩石捷徑,直走係大路前往大東山,想挑戰難度可左轉,直去亦可到達猩猩石。
  • 約1小時30分鐘:離開猩猩石。
  • 約1小時32分鐘:分叉路左轉接回大路上大東山山頂。
  • 約1小時40分鐘:到達大東山山頂。
  • 約1小時50分鐘:離開大東山山頂後可從大路繼續向爛頭營進發,或左轉行小路到爛頭營,最緊要望住爛頭營方向走。
  • 約2小時5分鐘:到達爛頭營及影芒草聖地。
  • 約2小時25分鐘:離開爛頭營黑色屋仔及影芒草聖地,向其他屋仔方向繼續行。
  • 約2小時35分鐘:有路牌,左轉向南山方向進發!
  • 約2小時42分鐘:有路牌,右轉向梅窩方向進發。
  • 約2小時55分鐘:有路牌,右轉向南山方向進發。
  • 約3小時:無路牌,見到有塊爛地,左轉向南山營地方向走。
  • 約3小時40分鐘:有路牌,十字路口右轉向嶼南道方向走。
  • 約3小時41分鐘:有路牌,靠左行向嶼南道方向走。
  • 約3小時45分鐘:接上馬路左轉直出嶼南道!