對我地黎講,Merrell Challenge 應該係今年最困難既比賽。

今次賽事,分開左三個項目,10K、14K同28K,10K係個人賽,14K同28K就三個人一組,經過一輪組隊之後,最後由飛龍、康師父同我一齊出戰呢個項目。28K路賽其實唔係問題,但由於包含左游水項目,對我地黎講,確實有啲不利,所以最後決定參加14k。呢個可能已經係今次比賽入面做得最好既選擇。

比賽當日,我地懷著奪標既心情,浩浩蕩蕩咁黎到南丫島。經過一番精密既計算,相信14K比賽可以係2小時內完成,九點開始,十一點慶功,十二點食晏,非常理想。


以奪冠為目標既我地,當然急不及待,準備起跑,槍聲一響,應聲彈出,雄姿英發,言談間有師兄告知呢個係28K起步,14K係下一槍,頓時訓醒、黯然U-turn,死死氣行返轉頭。好彩既係,係起點冇計時器,唔係應該比人DQ左。係出師未捷既包袱底下,我地再一次回到起點,重新上路。諗返轉頭,呢個可能係預兆….. “We Got the Hint!”

第二槍出發,已經冇左一鼓作氣既衝動,係後少少位置跟住人群上山。山路濕滑,大家都小心翼翼,而且路比較窄,不宜過人,只好跟係較前有利位置等侯時機,邁步向上,終於去到山頂,已經係 CP2,”We Got the Map!”

依圖所見,最快去 CP3 既方法係沿路落返去,只好冒住塞人既風險,硬住頭皮行返落去。講到下降好手不得不提康師父,轉眼間背影都見唔倒,事實係行山路感覺有啲鬱鬱不得志,但落到中段,飛龍問到:知唔知佢而家最想去邊,答案係迪士尼…..”落完”……可能係環境因素關係,其實幾好笑,鬆左一鬆,轉眼就落返山。

路(怒)跑到 CP3 蘆鬚城泳灘,信心即刻返哂黎,入面有 task 要完成,玩法係沙地有十個數字加一條算式,將數字由細至大填入算式,再計出正確答案就可以過關。坦白講,己隊受過高等程度教育既洗滌,區區一條加減乘除數點會難得倒我地!結果…我地計錯左三次,最離譜係其中一次計大左接近十倍,最後倫落到係沙地用”直式乘法”先計倒正確答案…”We Got the Answer!”

CP3 去 CP4 係海岸攀爬,即係行海岸線去第二個地方,師父再一次獨領風騷,輕快咁踩黎踩去,去前面先行探路。

下圖紅色係理想路線,先攀石,之後行山路去返家樂徑,再去 CP5,輕鬆完成。

反觀我地,行左藍色路線,係應該行海岸線爬石既地方,我地嘗試爆林,不果,U-turn,返去海岸線爬石;係應該轉出去既地方,我地認定係直衝爬石;係應該堅持繼續海岸線爬石既地方,我地又再走去試多次爆林,當然都係不果,唯有又再 U-turn,又乖乖地返去海岸線爬石,一波九折,終於去到 CP5。

結論可以用飛龍既一句話概括:「智取不成要強攻,強攻又唔夠力」。

呢種心情,或者只得 Beyond 會明白。

係漫長既整個攀石過程中,有好幾個地方無可奈何要澗水,好彩係 Merrell 對鞋係 Gore-Tex,可以唔駛顧慮太多就踩落去,繼續上路。但無奈既係,即使對鞋性能咁好,都敵唔過大自然。係飛龍澗水過程中既一個大浪,海水由佢腳脛入哂鞋,然後佢好冷靜咁輕嘆左一句 “今次真係飛龍入水”。

Merrell MQM FLEX GTX

喺 CP5,大會好窩心咁準備左食物同飲料為參加者,等大家有氣力繼續比賽。簡簡單單既補給,正正係我地當時最需要既野。”We Got the Food!”

事後睇返,去到 CP5 成績已經一落千丈。果刻,已經深深明白到「友誼第一,比賽第二」既箇中道理。

去 CP6 係上一段石屎斜路,終於可以一解悶氣,順利到達。

由於之前錯得太離譜,所以點去 CP7 都經過一番商討,最後決定避開山路,跑較遠既石屎路。見下圖:

藍色好大機會係最佳路線,當然,好路線我地總係選擇唔倒。綠色係全石屎,係就係遠少少,但跑快兩步總算可以補救,而真正既問題出左係黃色線。

黄色線行到一半基本上無哂石屎路或者山路可逃,咁當然,上天關左兩道門,總會開返三個窗比你:

  1. 回頭是岸
  2. 無盡爆林
  3. 引水道

最後唔知點解我地揀左引水道。好似下圖個師兄咁,不過師兄係行引水道上面,而我地係行入面。

本以為荊棘只會係勵志故事入面出現,直到比賽當日,先知會係坑道出現。但一如故事情節,障礙只會令大家繼續前進,向目標進發。係度停一停,諗深一層,其實我地已經係幸福既一群,可以係安全既地方成長、生活,有時會誤以為係理所當然,但實情唔係必然。

幾經辛苦,終於去到 CP7,手手腳腳已經多左幾條痕做戰績,有任務要做,但比起黎目的地既經歷,拉車軚已經唔算得係咩,但依然,師父教落:「沿途就算拉要拉得好看」。 “We Got the Muscle!”

喺度先多謝大會攝影師,當大家齊齊盪失路既同時 (包括佢地自己),佢地都不忘影靚相,係佢地身上,睇得到專業。

Merrell Challenge 既 HNR 奪標組,一至三號隊員已經由矮至高,細隻至大隻順序排列好

喺 CP7 遙望對岸,係終點 CP8 索罟灣,飛龍係只能遠觀、但未能得到,再加上半中暑既情況下,終於七步成詩,內容如下:

“啊! 我的愛! 索罟灣!
你是多麼的美
你是起點,和終點
我望到你,但我得不到你
啊! 我的愛! 索罟灣! ” (語調不作長述)
然後佢重覆左十次….. 攪到我都想一步成詩:“啊! 飛龍啊! 安靜吧!”

返終點,其他隊伍通力合作搵小路,然後大家浩浩蕩蕩咁凱旋而歸。

“We Got the Medal!”

而家諗返,仲係百般滋味在心頭。事實係比賽真係好困難,但係不斷湧現既逆境入面,有隊友同你一齊衝、一齊捱、一齊膠,其實係幾幸運。走錯路既仲有其他隊伍,但大家都可以守望相助,呢點更加難能可貴。認真思考一下,就算走錯路又如何,從來冇一條絕對正確既路;困境又如何,當之後睇返,會係經歷、成長;落敗又如何,真正贏得既係過程,係友誼。

“We Got each other!”

#多謝Merrell舉辦一個咁有趣既活動
#多謝Fitz俾機會我地參賽
#多謝Ar娜隊陪我地一齊瘋狂走錯路同支持我地
#多謝隊友你地真心膠到我會心微笑
#多謝HNR

Merrell Facebook 專頁
HNR 跑步團隊 Facebook 專頁

Fitz 文章連結: https://fitz.hk/?p=90246

更多:
Fitz Facebook專頁
[渣馬前夕] 也許 達標 這條路
或許長跑 是肥仔的救藥
Fitz Running 跑步

Advertisements