唔用狗帶行山 狗主:「BB唔會咬人」不過會走人!

城門水塘 (並非事發地點)

轉述朋友經歷:

城門水塘，衛奕信徑，有一對夫婦於大叫「黑仔! 黑仔!」原來夫婦二人帶狗行山，點知隻狗為咗追馬騮走入密林，失去影踪。狗主大驚，請求我朋友出手相助，上山搵狗。

朋友謙稱自己能力同裝備不足，所以婉拒狗主請求，勸佢搵漁護署或愛狗組織求助。至於最後黑仔搵唔搵得番? 不得而知。

資料圖片，並非事件中狗狗

「BB唔會咬人」

筆者細過畀狗咬過，幾十年後見未縛嘅狗都會驚，所以行山見有人帶狗，就第一時間走埋一邊，筆者甚至幾抗拒行走港島南區幾條山徑 (感覺上嗰度好多人帶狗行山)。

同一啲狗主傾過，佢哋帶狗行山，都唔鍾意用狗帶。佢哋嘅講法係，行山都係為咗享受大自然嘅自由自在，佢哋唔想狗狗畀條狗帶限制自由，失去享受大自然嘅樂趣。

問到驚唔驚唔犬隻野性大發，佢哋第一時間嘅反應係話:「BB唔會咬人。」

擔心BB咬人之餘，其實帶狗帶嘅目的，唔止避免佢咬人咁簡單。

就好似疫情期間立例要你戴口罩，你唔可以話:「我肯肯定自己有抗體，唔怕受到傳染，所以唔使戴。」事實上，戴口罩法例嘅目的，係預防染病者喺未知嘅情況下將病毒傳播開去。好以行山拎狗帶咁，唔淨止防止你嘅BB咬人，亦係避免狗狗受到不必要傷害。

因為郊外環境同市區好唔同，如果狗狗唔係經常去郊外，佢哋好易受到野生動物影響，嚴重嘅會走失或受到野生動物攻擊，所以用狗帶點都穩陣啲。