開始獨木舟旅程前，你要知的10個安全守則

近年獨木舟、直立板盛行，不少人更會加入露營、行山等元素，結合為「獨木舟旅程」。不過，呢類活動對技術及體能要求相當大，風險亦相對較高。

近年香港都有發生「獨木舟旅程」嘅意外，最嚴重一次數到2019年，有初學獨木舟人士，參加一個15公里、兩日一夜「獨木舟之旅」。點知事主划至6公里，於大澳一帶失踪，幾日後屍體於內地海域被發現。

租借私人獨木舟唔使證書

康文署轄下嘅水上活動中心，以及獨木舟總會與其相關團體嘅活動，對獨木舟租借人都有嚴格規定，並會要求呈交證書。好似上面呢一類超過10公里嘅獨木舟旅程，通常都要求具備銀章資格。

不過，因為獨木舟並非電動船隻，香港法例對於私人租用嘅獨木舟甚為寬鬆，加上現時獨木舟種類越來越多，令唔少初學者都可以越級玩一啲高難度活動。

獨木舟旅程10項安全守則

獨木舟總會提醒市民，參加超過10公里嘅獨木舟旅程時，應該遵守以下10項安全守則:

1. 最好有安全艇隨航
2. 每組最少三隻獨木舟同行；預先協議聯絡訊號
3. 留意天氣報告，可上網或致電天文台查詢
4. 出發前應將行程通知陸上負責人士及水警
5. 覆舟後不應離開獨木舟，遇危險環境除外
6. 應攜帶下列設備
   • 獨木舟上: 食物、水、後備衣着（乾）、水殼、地圖、指南針、拖繩或拖袋（5－8 米）、急救箱、防水電筒、暴寒膠袋、收音機或有防水裝置的手提電話、簡單修理用具、後備槳、求救設備、防水記事簿 / 板。
   • 安全艇上: 急救箱、修理箱、後備糧食及飲用水、求救設備、防水電筒、救生繩、暴寒膠袋、萬用刀。
7. 留意及避開航道及泳區
8. 避免於避風塘及海港範圍內划獨木舟
9. 避免在夜間划獨木舟。如在夜間划獨木舟，建議附有照明燈以策安全
10. 對本港水流及導航標誌應有一定的認識

政府或總會舉辦嘅活動，當然跟足以上守則，市民到私人租用獨木舟，亦應該盡力符合上述要求，做到安全又安心。

資料: 香港01、東網、香港獨木舟總會