著老西拎公事包登4000米沙巴神山 | 日本裁縫為挽救生意上山下海乜都得

日前位於馬來西亞沙巴嘅神山，出現有位穿著甚為奇特嘅登山者。呢位來自日本嘅旅客佐田展隆，著住全套西裝，打住領呔，腳上著住皮鞋，手上拎住公事包，登上海拔4,095米嘅高峰。

佐田展隆話咁樣做唔算係咩壯舉，亦無諗住要挑戰自己，其實佐田係日本一間洋服店老闆，佢話係為咗宣傳舖頭，先會著西裝行山。

話說三年前疫情爆發，佐田嘅洋服店陷入低谷。佐田為咗宣傳，呢三年來都著住西裝去參與各種極限運動，由爬山、滑雪，以至潛水、衝浪，為咗生意乜都肯做。一時之間，佐田嘅短片大受歡迎，有人見到佐田嘅西裝上山下海都得，亦令佐田嘅生意應接不暇。