今年四月北京舉行冰球測試賽,測試場館。

早前英、美、澳、紐等多個國家表示,唔會派官員出席北京冬奧。北京對「外交杯葛」當然唔驚,但如果運動員唔出席冬奧,外交部又點睇? 近日就有風聲話,NHL球星未必參與冬奧,如果係真就會直接影響聲勢。

疫情威脅NHL 有12場比賽延期

NHL 缺席冬奧,非關人權、民主等政治議題,而係實實在在嘅疫情威脅。北美呢個幾月爆發疫情,北美冰球聯盟 (NHL) 超過12場延期。有5支球隊,更索性提早放聖誕新年假期,暫停球會事務。

2014年索契冬奧加拿大派出NHL球星出賽,並取得金牌。

NHL 賽事延期,球會關閉,令賽程混亂。聯盟及部份球會擔心,如果繼續派球員參加冬奧,會令聯賽賽程難以如期完結。另一方面,中國亦有疫症問題,球隊飛到中國亦會增加風險。基於上述原因,NHL 內有呼聲禁止球星參加北京冬奧。

雖然 NHL 於11月已同意聯盟球星出席北京冬奧,不過疫情變數之下,佢哋會再次討論有關問題,而球員聯盟 NHLPA 亦提出擔憂。美國媒體指,佢哋會喺聖誕前有最終決定,以便國家隊安排陣容。

不過,瑞典藉 NHL 球員 Robin Lehner 已率先表明,佢因為擔憂疫情,唔會出席北京冬奧。

之前外交部發言人話,西方政府杯葛冬奧係「搬石頭砸自己的腳」,但如果冰球比賽無咗呢班 NHL 球星,賽事吸引力大打折扣,損失又會係邊一方呢?

資料: USA TodayMARCA


文章為作者意見,不代表Fitz立場。
歡迎投稿: http://fitz.hk/contribute/

首頁 > 運動 Sports > 奧運 Olympic > 北京冬奧2022.疫情令NHL球星卻步參賽