東京奧運發生難得一見嘅情況。田徑跳高項目,卡塔爾的 Mutaz Essa Barshim 同意大利 Gianmarco Tamberi,同樣跳過2.37米,並於2.39三跳失敗。當賽事裁判準備加跳,判定金牌誰屬嘅時候,卡塔爾Barshim 走向裁判,問:「其實係咪可以頒兩面金牌?」裁判睇過規例無問題,而另一選手 Tamberi 亦同意決定。最後今屆跳高項目,係繼1912年嘅斯德哥爾摩奧運十項全能項目,事隔109年後再次於一個項目頒發兩面金牌。

紅衫係卡塔爾Barshim,藍衫係意大利Tamberi

卡塔爾選手屬奪標大熱

外界評論,若果呢次要進入「加跳」環節,卡塔爾選手 Barshim 有望可獨攬金牌。因為佢可以話係現時最有實力嘅跳高選手:

  • Barshim PB 係2.43米,為史上第二最高紀錄。Tamberi 嘅 PB 只有2.39米,為2016年所創
  • Barshim 奧運奪獎經驗豐富,佢係2012倫敦奧運及2016里約奧運銀牌
  • Barshim 於2017年同2019年連兩屆拿下田徑世錦賽冠軍
  • 反觀 Tamberi 於2016里約奧運前發生意外斷腳後,今年先回復昔日水準

所以 Barshim 主動拒絕「加跳」,同對手分享金牌榮譽,唔少評論都覺得好出奇。

Tamberi 2016年斷腳,佢專登拎埋當時嘅石膏去田徑場,陪住佢比賽。

相識11年成為摯友

兩人相識於2010年世界青年錦標賽,Barshim 話當時嘅 Tamberi 行為好黐線,但好得人鍾意。而之後佢哋兩個走勻全世界比賽,友誼亦一日比一日深。到 Tamberi 早幾年斷腳,Barshim 更成為佢最大支持者。而 Barshim 結婚,亦邀請 Tamberi 出席婚禮。

意大利嘅 Tamberi 亦相當感激 Barshim 嘅支持,大家喺田徑場雖然係對手,不過惺惺相惜,互相鼓勵。

東京奧運「最佳時刻」

生於卡塔爾嘅 Barshim,以大熱姿態放棄獨取金牌,中東媒體並無覺得可惜,反而讚賞 Barshim 呢個決定,覺得佢充份表現體育精神。有記者更加以「最佳時刻」形容呢項舉動,覺得呢個時刻充滿「善、愛、與人性」(The goodness. The love. The humanity.)

反而 Barshim 嘅回應好簡單:「我希望我哋成為下一代嘅好榜樣。」

頒獎禮上兩人同時獲頒金牌

資料: 半島電視台華盛頓郵報

首頁 > 運動 Sports > 奧運 Olympic > 東京奧運「最佳時刻」.跳高雙金牌卡塔爾選手棄獨攬機會