東京奧運受疫情影響,比賽場館「觀眾免進」,不過唔少項目主隊日本仍然有主場優勢,靠嘅係佢哋最強嘅軟實力: 動漫BGM!

女子 3X3 籃球

主場日本隊進場,球場響起《男兒當入樽》主題曲《好想大聲說喜歡你》(君が好きだと叫びたい),呢首歌於1993年發行,係經典中嘅經典,係咪鍾意打籃球都一定聽過。

男子排球

日本男子排球隊以局分3:0擊敗委內瑞拉。完場一刻,場館播出《排球少年》主題曲《Imagination》。

《排球少年》呢套動漫被選為歷年最受歡迎動漫5強,日本男排唔少成員都係fans,所以播出《Imagination》嘅時候,無論電視觀眾以至場內日本運動員,都聽到感動非常,有運動員仲話自己流下男兒淚。

射箭混合團體賽

射箭場於比賽休息時播出《進擊的巨人》主題曲《紅蓮的弓矢》。《巨人》係一個人類逆求存嘅故事,相當熱血,相信會激發運動員嘅鬥志。

擊賽梗係播一拳超人」

早幾年日本政府搵咗幾個動漫人物宣傳奧運,不過對大多數擁有「中二魂」嘅動漫fans嚟講,月野兔同蠟筆小新呢啲根本唔可以收貨。好多人都話要激發運動員鬥志,有大把動漫人物同BGM可以揀:

拳擊: 埼玉老師

《一拳超人》埼玉老師所向無敵,一拳終結對手,如果佢或者佢嘅音樂可以喺拳擊館出現,話唔定今屆日本拳手可以打高幾班。

公路單車: 小野田

《飆速宅男》四眼仔主角小野田,秘技係一邊上斜路一邊大聲唱《公主歌》。呢首歌如果喺奧運賽道播住,肯定會令日本選手提升鬥志。 (按: 公路單車已經完成賽事,剩返嘅計時賽大致踩平路,唔使上斜路)

唔少人仲提出「跨項目」嘅最強運動員 (即係話佢哋玩乜都可以贏晒),例如《我的英雄學院》歐爾麥特、《龍珠》悟空、《鬼滅》嘅炭治郎等。估唔到奧運都可以令大家想像力大提升。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 奧運 Olympic > 東京奧運最強主場氣勢《入樽》《排球少年》《進擊的巨人》動漫BGM響徹場館