長生蠔 (Magaki) 係日本著名海產,肉質肥美,味道鮮甜,屬冬季美食,無論做刺身同天婦羅都屬上級之選。最近東京灣收割咗14噸長生蠔,不過唔可以放上餐桌要全部棄置,因為佢哋嘅生長地點,係今次奧運划艇比賽場地。

《BBC》報道,奧運前夕「海之森水上競技場」用來防止海浪影響運動員嘅浮板無故下沉,當局經調查後發現,原來有大量生蠔依附其上。生蠔會破壞設施,亦有機會傷害參賽運動員,但因為呢度係日本全國唯一符合國際標準嘅划艇場地,所以就算問題多多,都唯有積極清理生蠔。結果有關方面動用超過128萬美金 (約1,000萬港幣),於5.6公里海面,清理約14噸生蠔。

而可惜嘅係,生蠔雖然有價,不過當局話因為未有衛生證明,唔可以食用,所以要將佢哋全數棄置。

此外,「海之森水上競技場」除咗生蠔為患,7月份氣溫可以高達40度,亦令選手及觀眾非常疑慮。

資料: BBC

首頁 > 運動 Sports > 奧運 Olympic > 東京奧運.東京灣生蠔影響划艇項目