Ratchanok Intanon 著住 Yonex 特製球衣

東京奧運香港羽毛球隊發生「波衫事件」,問題係咪圓滿解決,大家心中有數。原來,泰國奧運羽毛球隊亦有球員要陣前換衫,不過透過政府及商業品牌通力合作,危機得以化解,更得到支持者讚賞。

Ratchanok Intanon 係泰國體育明星,係泰國史上第一位羽毛球世界冠軍、第一位世界排名第一球手,亦係世界羽毛球錦標賽最年輕嘅女子單打冠軍。

名銜一籮籮,實力亦相當強橫。東京奧運一出場,第一場 Ratchanok Intanon 就輕取匈牙利選手2:0,第二場對馬來西亞選手亦順利贏出。

不過佢著住嗰件官方球衣,就令民眾有所不滿。

泰國官方黃色球衣,被民眾話衣不稱身

泰國「換波衫事件」

Ratchanok 分組賽連贏兩場,但泰國民眾話件衫太過鬆身,令人覺得衣不稱身,要求當局換過套衫。

泰國羽毛球國家隊嘅贊助商係當地運動品牌 Grand Sport,佢哋同國家隊簽咗合約,基本上係唔可能臨時換衫。不過 Grand Sport 對於民眾嘅不滿全盤接受,但係話國家隊嘅衫全部係訂做,並無現貨,想換 size 都唔得。

Grand Sport 喺唔影響運動員嘅原則之下,搵咗 Ratchanok 嘅個人贊助日本品牌 Yonex 協助,情願放棄自己合約上利益。而政府以及泰國羽毛球協會亦通力合作。結果,Ratchanok 喺對住印尼球手嘅16強賽,著返自己熟悉 Yonex 戰衣,直落兩局擊敗對手晉身8強。

國旗遮蓋 Yonex 標誌 圖: Siamsport

雖然 Ratchanok 最後輸咗俾中華台北嘅戴資穎,不過泰國民眾仍然收貨,而且對 Grand Sport 嘅做法相當讚賞。

Ratchanok Intanon 一直都鍾意著Yonex無袖球衣作賽

一個危機,最後令 Grand Sport、Yonex 同 Ratchanok 同樣得益,並無引發關公災難,其成功嘅關鍵,就係替別人著想,而唔係計較自己眼前利益。

資料: Bangkok Post


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 奧運 Olympic > 東京奧運.泰國羽毛球一姐賽前被逼換衫,危機化解民眾激讚