東京奧運發生難得一見嘅情況。田徑跳高項目，卡塔爾的 Mutaz Essa Barshim 同意大利 Gianmarco Tamberi，同樣跳過2.37米，並於2.39三跳失敗。當賽事裁判準備加跳，判定金牌誰屬嘅時候，卡塔爾Barshim 走向裁判，問:「其實係咪可以頒兩面金牌?」裁判睇過規例無問題，而另一選手 Tamberi 亦同意決定。最後今屆跳高項目，係繼1912年嘅斯德哥爾摩奧運十項全能項目，事隔109年後再次於一個項目頒發兩面金牌。
卡塔爾選手屬奪標大熱
外界評論，若果呢次要進入「加跳」環節，卡塔爾選手 Barshim 有望可獨攬金牌。因為佢可以話係現時最有實力嘅跳高選手:
- Barshim PB 係2.43米，為史上第二最高紀錄。Tamberi 嘅 PB 只有2.39米，為2016年所創
- Barshim 奧運奪獎經驗豐富，佢係2012倫敦奧運及2016里約奧運銀牌
- Barshim 於2017年同2019年連兩屆拿下田徑世錦賽冠軍
- 反觀 Tamberi 於2016里約奧運前發生意外斷腳後，今年先回復昔日水準
所以 Barshim 主動拒絕「加跳」，同對手分享金牌榮譽，唔少評論都覺得好出奇。
相識11年成為摯友
兩人相識於2010年世界青年錦標賽，Barshim 話當時嘅 Tamberi 行為好黐線，但好得人鍾意。而之後佢哋兩個走勻全世界比賽，友誼亦一日比一日深。到 Tamberi 早幾年斷腳，Barshim 更成為佢最大支持者。而 Barshim 結婚，亦邀請 Tamberi 出席婚禮。
意大利嘅 Tamberi 亦相當感激 Barshim 嘅支持，大家喺田徑場雖然係對手，不過惺惺相惜，互相鼓勵。
東京奧運「最佳時刻」
生於卡塔爾嘅 Barshim，以大熱姿態放棄獨取金牌，中東媒體並無覺得可惜，反而讚賞 Barshim 呢個決定，覺得佢充份表現體育精神。有記者更加以「最佳時刻」形容呢項舉動，覺得呢個時刻充滿「善、愛、與人性」(The goodness. The love. The humanity.)
反而 Barshim 嘅回應好簡單:「我希望我哋成為下一代嘅好榜樣。」
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
