東京奧運．射箭場32度高溫，俄羅斯選手中暑退賽

日本受熱帶氣旋影響，大多地區維持高溫及潮濕，運動員難以適應。

星期五夜晚雖有開幕禮，但朝早及下晝分別舉行女子及男子射箭排名賽。高溫亦影響射箭場地夢之島公園，比賽時最高氣溫達到攝氏32度，多個來自溫帶地區嘅運動員難以適應。當中來自俄羅斯女箭手Svetlana Gomboeva，於比賽初段已出現身體不適，期後被送入醫院。Svetlana 隊友其後於社交平台發佈消息，證實佢係中暑。

俄羅斯射箭教練 Popov 話佢執教以來，從未遇過咁嘅比賽環境，佢話當時場地十分悶熱，地面好似燒紅嘅鐵板一樣。

不過，韓國女子射箭隊仍然發揮水準，於排名賽取得頭三名。

東京盛暑出名難頂

每年7至9月，東京天氣都出晒名酷熱難頂。有關方面已早有部署，期望將天氣影響減至最低，例如將馬拉松及競步賽，移師至北海道札幌舉行；三項鐵人及馬術盛裝舞步，提早於凌晨比賽。而奧委會亦回應會加強場地降溫設施，例如喺場地灑水，以及提供雪糕及風扇予運動員及工作員。

不過，東京始終係熱，2020年東京共有65000人中暑，當中112人死亡。疫症以外，東京奧運要對嘅難關真係一浪接一浪。

資料: India Today、搜狐