東京奧運香港羽毛球隊發生「波衫事件」，問題係咪圓滿解決，大家心中有數。原來，泰國奧運羽毛球隊亦有球員要陣前換衫，不過透過政府及商業品牌通力合作，危機得以化解，更得到支持者讚賞。
Ratchanok Intanon 係泰國體育明星，係泰國史上第一位羽毛球世界冠軍、第一位世界排名第一球手，亦係世界羽毛球錦標賽最年輕嘅女子單打冠軍。
名銜一籮籮，實力亦相當強橫。東京奧運一出場，第一場 Ratchanok Intanon 就輕取匈牙利選手2:0，第二場對馬來西亞選手亦順利贏出。
不過佢著住嗰件官方球衣，就令民眾有所不滿。
泰國「換波衫事件」
Ratchanok 分組賽連贏兩場，但泰國民眾話件衫太過鬆身，令人覺得衣不稱身，要求當局換過套衫。
泰國羽毛球國家隊嘅贊助商係當地運動品牌 Grand Sport，佢哋同國家隊簽咗合約，基本上係唔可能臨時換衫。不過 Grand Sport 對於民眾嘅不滿全盤接受，但係話國家隊嘅衫全部係訂做，並無現貨，想換 size 都唔得。
Grand Sport 喺唔影響運動員嘅原則之下，搵咗 Ratchanok 嘅個人贊助日本品牌 Yonex 協助，情願放棄自己合約上利益。而政府以及泰國羽毛球協會亦通力合作。結果，Ratchanok 喺對住印尼球手嘅16強賽，著返自己熟悉 Yonex 戰衣，直落兩局擊敗對手晉身8強。
雖然 Ratchanok 最後輸咗俾中華台北嘅戴資穎，不過泰國民眾仍然收貨，而且對 Grand Sport 嘅做法相當讚賞。
一個危機，最後令 Grand Sport、Yonex 同 Ratchanok 同樣得益，並無引發關公災難，其成功嘅關鍵，就係替別人著想，而唔係計較自己眼前利益。
資料: Bangkok Post
講求綠色、環保、天然的健康生活。推廣新一代健康生活文化。
