毅行,已經唔知由邊度講起好。

噢,首先要恭喜顧問畸畸同三位隊友,金澤馬拉松都跑倒好好既成績。當平日放工返屋企既時候,佢地interval;星期六日做宅男既時候,佢地練長課,望住佢地,完全體驗到「你的練習如何,你的成績也必如何」既箇中真理,所以好成績,值得擁有。

講返毅行,原來轉眼間,星期五已經要比賽。如果有參加過毅行的話,應該都有同樣既感受,講緊既係會比身邊嘅朋友,帶上一個個既光環。即係「你地咁 fit,一定得啦」、「唔駛練都搞得掂」、「24粒鐘會唔會太睇小自己呀」……講到未行先上岸咁。我地都飄飄然,以為實得。但當有啲目標時間達唔倒、隊友受傷既既時候,感覺好似係大帽山跌到落扶輪公園咁,唔止腳斷,心都碎埋。但人總需要勇敢生存,檢討下,睇下有咩地方可以再做得好啲,希望當日發揮得更好。

可惜既係,時間總會係敵人。如果而家有人問係咪準備好充足,唔係。係咪好有信心,都唔係。咁即係點,只可以話,我地會付出120%既努力去達成目標,剩返既交比上天。


話說為左今次既毅行,為左比賽當日唔影響其他組別,係操練既過程入面,己隊將僅有既才華轉化為唔同既指令,可以借機會分享一下:

口號篇

  • 「佛系」: 減速
    佛系不急不趕,隨遇而安。
  • 「24」: 加速
    24係Target,要上心d,走快d。
  • 「獅子」: 停
    如果想問獅子點解係停,要上一上麥徑補習班。

陣式篇

  • 「Sandy」: 一字排開
    靈感來自 FB 紅極一時既網絡圖片。
  • 「Jolly」: 一個跟一個
    靈感來自 Sandy。
  • 「藍妹」: 兩前兩後
    靈感來自亂up。

唔好問啲陣式口號有咩用,We will know when we know it.

再為毅行添加多一點色彩,己隊口號係「段段難過段段過」,完全體驗倒個種迎難以上既精神。

今個星期,終於收腳啦,可以做既得返放鬆心情,做個廢; 係床下底拎隻晴天公仔出黎掛下窗邊,希望比賽當日唔好落雨; 打比睡魔,叫佢星期五晚唔好打黎。到星期五,盡力去完成。仲有既係,將光環送返比咁多隊友隊,「毅行單獨不好」,所以好榮幸可以同佢地一齊玩哩個賽事,亦都好開心大家一齊練習過、嘻哈過,期待一齊可以順順利利完成:

Forerunner x Fourfinsher

如果畸畸隊好似畸畸咁講畸畸係最慢一個,完全諗唔倒半點理由擔心你地,最緊要當日唔好受傷,好相信你地會彌補倒上年嘅遺憾,加油。畸大,終點見。

PowerGal

時間對你地唔公平,但劣勢下你地都完成左一個個既挑戰,事實係你地每一位既潛力都足夠應付哩個比賽,再加上雲茄既專業,對你地超有信心。希望你地都可以突破自己,做自己本身的傳奇。

勝敢悠蜜

仍然係「睇住你地大,睇住你地快」。同你地操山完全感受倒你地既投契程度、努力程度,努力到去鹹田玩水都撞倒你地操山 (自愧不如mode)。100K難唔倒你地,只要比賽當日繼續吹下水,毅行好快比你地吹得過。

Wild You so High

令人羨慕既一隊,有字典、影帝、美女,可否玩 Changing Teammate,我地有禽獸、mean精、訓導、智障任揀。你地既知識、經驗完全可以應付倒成個比賽,希望你地走倒理想成績。

Hike for Fun

係你地 Fun 之餘,其實都眼見你地好勤力操山,毅行唔係一件容易既事,但感覺你地可以好好感受每一段路,齊齊整整返終點,到時見。

多謝名單

最後,由於仲未可以排除剪帶既可能,所以趁而家仲有機會成倒事,先多謝各單位:

隊友

有人話玩完毅行會反面,就可以理解倒點解會有佛系24哩個組合,但同哩幾條友玩耐左,想反面都幾難。點都好,仍然覺得冇其他隊友會比你地更煩、更嘈、更有才華,I am right where I want to be.

畸畸

係成個操練過程入面比左好多意見,點樣可以做好啲,時間應該點分配,甚至乎花好多時間陪練。仲記得第一次行針草帽,差啲行到英年早逝,諗起都想嘔。但同時都為毅行既練習揭開序章。一場兄弟,盡在不言中。

HNR團長s

說話2016年一月有兩個人搭左個雞棚出黎,帶大家去跑步,欣賞香港唔同既境色,同時間塑造左一個平台比大家交下朋友,交流下心得,然後好多友情、愛情、基情都係入面誕生左,同時間促 成左今日幾隊毅行隊伍。搭哩個棚都辛苦啦,仲要維繫左2年,多謝兩位。

Fitz

如果話哩一代人係玩FB大的話,不排除下一代係睇Fitz大,一個好好、好有創意既平台去分享、提供運動資訊。

Support Team

雖然佛系24會有條友同你地講:「可以 Support 倒我地係你地一生最大嘅榮幸」,但事實係心入面,衷心多謝每一位 Supporter 所付出既精神同時間。冇你地,終點只會係無限遠。

善長人翁

真心感謝咁多位有支持過,甚至真金白銀捐過款比我地既每一位朋友,可能你地只係想做下善事,但都選擇透過我地黎做,感激。你地既支持會係無限既動力,多謝! 多謝! 多謝!

最最最後,時間係好重要,但更重要既係大家可以安安全全、齊齊整整咁到終點。各位,加油,大棠見。

We are「佛系24」

佛系24 Facebook專頁
佛系24 籌款網頁

Fitz 連結: https://fitz.hk/?p=107489


更多:
Fitz Facebook專頁
[佛系24] 佛系操山 麥徑四段
[佛系24] 七一大夜行 麥徑三、四段
Fitz Running 跑步

廣告