Fitz > 運動 Sports > 行山 Hiking > [佛系24] 佛系操山 麥徑四段

是咁的,我地黎自不同界別,但一齊加入左同一個跑團,然後一齊學人跑山,其中三個膽粗粗參加左 Merrell Challenge,然後理所當然咁撞哂板。但比賽教識我地既係,今次比賽表現得唔好,就去搵第二個更難更高挑戰性既比賽再去撞板一次。

所以,我地搵埋第四個隊友,齊齊去抽毅行。然後,承蒙幸運女神既眷顧,抽中左,我地抱住不強求、不奢望,緣份到自然一齊操、一齊衝既心態,組成左: HNR-佛系24,目標係24小時內完成比賽。

(左至右) 飛龍,Cyrus,Will仔,康師父 揸機: KK大師 (按: 唔係KK陳國強,之後有相)

We are『HNR-佛系24』

大概麥理浩徑已經比人討論過無數次,但我地仲係想用我地既感受,同各位分享一下。

麥四起點係水浪窩,下圖既紅圈位置,但如果集合點係西貢,就要坐多一程巴士 (99/99R/299X),如果想慳一程巴士同時間,可以考慮係西貢市中心出發,行去竹洋路作為起點 (藍圈位置),然後係綠圈位置會合返麥徑四段。

竹洋路長度同斜度同係水浪窩出發都相差不遠
如果P走我地四個,就係竹洋路既起點

操山好、行山都好,水同食物都唔少得,由其係大熱天時,加上四段辛苦,建議至少要有1.5L至2L水,多少視乎個人飲水量而定,每次飲水可以飲少啲,分開多幾次飲,等身體慢慢吸收,唔會浪費。食物方面,可以考慮帶定能量 bar 作為充饑之用。

同水浪窩出發一樣,一開始都係漫長既斜路,直至去到上圖黃圈既位置,由於斜路都真係幾長幾斜下,跑會浪費好多體力,但又唔會快得太多,所以可以考慮細步、密密腳咁行上去,減少對大腳既負荷。

匯合點前分叉路口向黃竹洋方向前進
麥徑匯合點
地圖黃圈位置,斜路頂部,轉左落斜

大概上1.8k之後,終於都到斜路頂,抑鬱既情緒可以得以舒發,之後係轉左大落斜,可以轉為跑,但唔好太輕奮,注意速度,上落斜肌肉唔太同,所以最好適應一下先,加上都幾斜下,要小心失速同傷膝頭。

跑到落路口就轉入左線 (上圖),都係平路,可以繼續跑過去,注意石頭、樹根,當然仲要留力,保持一個舒服既 pacing,畢竟仲有慢慢長路。

路口轉右

計埋落斜大概跑倒800m左右,鏡頭一轉就會跑到去呢個位置,轉左上山,惡夢正式開始。

接住落黎係天梯式上山,大既要走2.5k路,上升330米,多數為石級同爛路,落完雨要小心地滑,有得揀可以揀啲細級啲既石/泥路慢慢上,腰直,保持放鬆,注意速度同補水,唔好谷、唔好爆,但都好辛苦,要打打氣的話可以聽下 “天蠶變”。

“獨自在山坡 高處未處高 命運在冷笑
暗示前無路 浮雲遊身邊 發出警告
我高視闊步” 

呢個牌仔有少少尷尬,方向係右轉繼續上山
馬鞍山係看似很遠,事實都好遠既地方
當見倒有段跑得既路,已經離最高點好近,留返啲力上埋去先跑

M078牌仔,登頂,箇中既滋味,可以留意返師兄既表情-Mean中有淚。望住牌仔轉左繼續前進,總算係苦盡甘來,相對平坦既路,加上景色優美、居高臨下,有種融入既滿足感,不妨輕輕跑下同表達對大自然既愛意 (如下圖)。

接住既係全落山路,保持住輕鬆既心情,飛龍教落: 諗住迪士尼,就好快『樂園』,但要小心碎石。

1.2k之後會去到哩個亭,體力不支既可以行右面落恆安,而麥徑方向係左邊既基維爾營。大概跑800m平路就到昂平,哩段都幾好跑,可以快返少少 面對大草原,當時要抖一抖,影返張靚相,遺憾既係我地唔靚,只係型,繼續趕路。

人生其中一個困難莫過於:你已經好攰,但發現只係走左一半既路程,更顯得留前鬥後既重要性。一齊操山既好處係,當你好想放棄,而隊友仲好 high 既時候,自己都想谷埋佢。相反,當隊友面有難色既時候,可以笑返佢體能差,叫佢比多啲掙扎,推推佢走埋落去啦,大概係 1+1+1+1>4 既原理掛。

昂平之後係繼續下降,感覺都係舒服既,可以好快走多1.3k,去到茅坪。望住黃牛山,先記返起上山既辛酸,1.7k上170m,比起馬鞍山其實唔算得啲咩,但計埋累積既疲勞,其實都幾點甘下,水份補充仍然好重要。撐過黃牛山,就開始落石板路,感覺幾危險同落雨應該會好滑,都係小心為上。之後既都係上上落落,KK大師教落,聽倒水聲就到基維爾營。

直去基維爾營,右轉繼續走麥徑

走左大概12.5k,終於跑完第四段,轉返出石屎路,作為街跑友,有種說不出既快樂。轉右向下跑,見倒個停車場,再望下左邊,五段山路入口…說好的獅子亭呢 (喊出黎)! KK大師話仲要打大佬先到,講完就一支箭咁跑左入去,我地幾個一直以為”大佬”係“boss”既意思,有邊個會知係解”大老山”,崩潰! 雖然已經筋偈力疲,但都到左打大佬時刻,都要跟埋去架啦。

五段山路入口
大佬,你地都等埋我先一齊打大佬丫

最後,呢個大佬基本上係1.5k,先平後斜。後段上升120m,到頂向前走多250m就見倒我第二期待既畫面-“沙田坳道”!

最後石屎路落斜,衝呀

沿住沙田坳道落1K左右,見倒下圖路口,去到我最期待畫面-“獅子亭”,完成!


KK大師表示輕鬆,仍然 rock n roll!

大合照,但願日後我地可以繼續保持“不羈”同“不基”,加油!

最後,如果你鍾意我地;鍾意篇文;鍾意食花生;鍾意睇人食花生,可以 like 返我地個 page: 佛系24

當然,歡迎透過我地支持返樂施會扶貧救災既工作! 我地都會繼續努力,24從來不是夢!

樂施毅行者籌款網頁 [隊伍編號 : 0666])

We are『HNR-佛系24』。

佛系24 Facebook專頁  
佛系24 籌款網頁

Fitz 連結: https://fitz.hk/?p=97391

更多:
Fitz Facebook專頁
[毅行教室教學] 以氣行山 控制呼吸 輕鬆上山 (三)
[毅行教室教學] 行山上樓梯、上斜 4點輕鬆心法 (二)
[毅行教室教學] 如何輕鬆落山 避免腳痛及受傷 (一)
Fitz Running 跑步


文章為作者意見,不代表Fitz立場。