1977年兩毫郵票

各位馬友,有無興趣聽聽登陸筆者講講香港馬拉松的歷史嗎?

香港第一個有正式記錄的馬拉松,是在1969年12月14日。這個馬拉松是香港節的其中一個節目兼誌慶元朗體育館的啟用。事緣香港經過1967年暴動,當時的港英政府為安撫民心和營造歌舞昇平的氣氛,於是便在1969年12月6日至12月15日舉辦「香港節」。在香港各區舉辦各式各樣大型的文娛慶祝活動。當年孩提的筆者和姐弟妹們,還帶同櫈仔到彌敦道看花車巡遊呢。

據業餘田徑總會的記載,這個比賽吸引到八個國家/地區,27位國際選手參與;而南韓跑手金澤鈞以2:22:39戴上桂冠。你諗下: 咁大型嘅本地體育活動只有27位選手;其中香港選手有幾多? 咁就唔知囉。無他,其實當年小島居民,幾乎全民都已經很努力奔馳──包括細路仔──不過係為口奔馳! 那裏有閒情閒時做埋啲嘥氣嘥力,而又無償嘅奔馳活動。體育活動? 馬拉松賽事? 當然就沒有可能在這個時期萌芽發展啦。

以地區名義搞的長跑比賽,元朗區有路跑又有越野賽,十分多元化。圖為「元朗區體育節2016」

話番轉頭,筆者起初跑步,只不過是以消閒健身為目的;並沒有想過參與跑步競賽。然而,當筆者看了1976年奧運有關馬拉松的報導,心裏悠然而生想一嘗箇中滋味。馬拉松真的是折騰人的運動嗎?

1977年12月4號,香港終於有公開的馬拉松賽事。賽事由香港長跑會主辦,駐港英軍協辦。賽事起點及終點在石崗軍營內。賽道主要是環繞石崗軍營外圍的錦田行人路。


仲記得,筆者起初跑步時,跑上一、兩分鐘,小腹就隱隱作痛,好多時仲痛到企都企唔直,彎哂腰。(當時完全無運動常識,唔知係無熱身嘅結果,仲騐:唔通跑步唔係人人都可以? 定抑或個天要俾啲考驗筆者,睇下筆者夠唔夠堅持?) 經過兩年多的閒走練習,筆者已經可以不停的跑上半個──唔係半個馬拉松距離──係半個小時。自忖: 現時可以半小時走近5哩 (當時以英哩計為主)。咁計法,兩個零鐘就跑完全程26哩啦! 計埋後尾腳軟,慢番少少,頂多唔使三個鐘就可以跑完啦。哈哈,比對1908年奧運冠軍,摔了五次跤的皮特利以2:55:18的成績,也差不了多少!

所以,當筆者收到有馬拉松賽事這個消息,就興高采烈的往取報名表後,並立刻填上有關資料連埋港幣2元報名費支票寄出 (2019年香港馬拉松報名費就要港幣450元啊)。之後,盤算着如何練習。心裏還笑着: 哈哈,終於可以一展所長啦! 等住睇表演啦!

唔記得等咗幾耐。總之,接近比賽前收到賽會的回郵信封。打開一睇,吓,大會唔俾筆者出賽! 仲隨信附回10個2毫子郵票的比賽報名費用 (筆者仲保存兩個郵票)。原因係:筆者填報名表時話無參加過任何跑步比賽,又無醫生証明身體狀況適合跑馬拉松喎。豈有此理,咩咁巴閉! 筆者起初跑步就只為無聊而已,點會參加甚麼公開賽? 老實講,當時傷風感冒,都係阿媽煲劑芒果核苦茶搞掂。而家無病去睇醫生証明適合參賽;唔駛錢咩!

唔俾參賽咪唔跑囉,係賽會嘅損失! 不過,筆者辛苦練習就付諸流水。天啊,你真要埋沒這個天才麼? (嘻嘻,當時發傻的想!)

Fitz 連結: https://fitz.hk/?p=102385


更多:
Fitz Facebook專頁
馬拉松的承諾
香港長跑行山比賽
Fitz Running 跑步


文章為作者意見,不代表Fitz立場。

歡迎投稿: https://fitz.hk/contribute/

廣告
亞霍
1974年開始跑步. 初時只為閒時消磨健身. 第一個跑步賽事是1978年的半馬拉松. 1979年完成了第一個全馬之後, 筆者就中了跑步索K毒. 眨眼過了登陸之年, 現時轉職量地, 度42.195K!