事發地點: 利川高速

大陸湖北利川市高速公路,日前展開打擊醉駕行動,警察喺公路設置路障,期間截查一名吳姓嘅男子。檢查初步顯示,男子體內酒精含量嚴重超標,警察即時採取拘捕行動。

就喺呢個時候,吳姓男子突然落車拔足狂跑,突破警察防線20米。不過與此同時,一名警察突圍而出,成功欄住醉酒男,並將其拘捕。

事後呢名醉駕男子向記者透露,佢自細係運動健將,而且係體育學校畢業,以為自己有高人一等嘅運動神經,所以當被發現酒精超標,就諗住可以跑贏警察著草走人。不過,佢無諗過一山還有一山高,捉佢嘅警察係長跑健將,仲成日參加大型長跑比賽。

最後,醉駕男被即時停牌,並且追究刑事責任,睇怕佢有排煩了。

資料: 新浪網

首頁 > 運動 Sports > 跑步 Running > 大陸體校運動健將 被發現醉駕 落車奔跑廿米後被擒