Fitz > 運動 Sports > 跑步 Running > 專訪余顯華.澳洲黃金海岸馬拉松最快港人,月跑里數高達750公里

於今屆澳洲黃金海岸馬拉松賽事,香港運動員余顯華首次挑戰馬拉松賽事,以2小時28分25秒完成初馬,全馬港將成績最佳!

問: 今次你去參加黃金海岸跑馬拉松。點解揀呢個賽事? 幾時決定?

答: 3月左右知道場比賽有機會舉辧到,當時已經心動,加上香港封運動場、要戴口罩做運動、學校課外活動又停,甚至唔知幾時先至復課同比賽,考慮完最終決定成行。

問: 共有幾多個學生參加比賽? 係邊個距離? 結果係咪預期之內

答:今次有3個學生參加半馬,佢哋都做到PB。睇返佢哋平時練習嘅表現,我相信佢哋仲有進步空間,比賽時間可以更加好。

問: 你4月已經過左澳洲準備今次比賽,月跑里數曾經高達750K,過程有冇咩困難?澳洲嘅訓練方法同香港有冇咩唔同?

答: 過澳洲準備比賽要處理好多問題,首先出發前要搵短租嘅地方 (好幸運有朋友提供住宿)、亦要搵練習嘅團隊 (呢個都好好彩遇到非常有心嘅教練同 run crew)。去到當地亦要尋找訓練嘅地方以及準備自己嘅三餐,每樣嘢都要計算清楚,對我嚟講都係挑戰。

呢兩個幾月好多時要朝早6點練習,因為練習場地距離我住嘅地方較遠,就要麻煩朋友載我去練習。
另外悉尼無乜平路,加上我住喺山區,平時只可以圍住間醫院跑車路,試過有幾日打風同落大雨,我都幾驚會出意外。

我覺得呢邊嘅訓練會根據跑手嘅身體狀況去定,狀況好會跑快啲、唔好時就慢啲甚至休息;但香港嘅練習就要跑足同跑夠數,甚至明知身體頂唔順都會夾硬跑晒定咗嘅課表。

問: 全馬前你參加左一個 10k 一個半馬去檢視自己狀態,當時對自己初馬定立咩時間? 對於今次初馬,比賽前已經有信心做到目標時間?

答: 其實喺香港練習時,我估自己可以跑到2:30左右。而澳洲嘅練習再鞏固我本身個底,呢段時間都幾肯定自己跑到2:30內。但因為係初馬,唔想俾太大壓力自己,所以無刻意去定一個時間。

問: 比賽過程有無嘢可以分享下? 同香港比較係天氣,跑道,路況之類? 有冇遇到咩特別事,例如 miss 水站咁?

答:一開頭我跟住集團跑,大家都跑得好輕鬆,亦會傾下計。我喺第5k同第15k拎唔到自己嘅補給,要靠大會嘅水站,其他選手仲遞咗佢嘅補給俾我。比賽中大家都有共同目標: keep住呢個集團嘅人,大家一齊跑個好嘅時間、無分你我。

比賽當日嘅濕度比較高,好彩無落雨,好多人話呢條跑道全平,不過我就唔太覺,去到某啲地方路況仲有啲爛添。

問: 你下一個目標會係咩野? 會唔會再跑全馬? 

答: 下一個目標我想跑返穩定嘅成績,至於跑唔跑全馬就遲啲先諗。

問: 下一個比賽會係?

答: 應該係天水圍10K

問: 有無邊個想特別多謝?

答: 要多謝好多人嘅幫忙同支持!

多謝太太、屋企人、跑班學生同學校俾我放咁耐假去練習,多謝Jay一家俾我寄宿2個月,仲載我去練習、買餸、買宵夜同帶我去玩,多謝 Run Crew 教練 Gary 同埋一齊練習嘅 Teammate,多謝仍然相信我嘅贊助商。

相片提供: Beyond_theroad_, 余顯華 FacebookInstagram


文章為作者意見,不代表Fitz立場。
歡迎投稿: http://fitz.hk/contribute/