我逆故我在

一世人流流長，邊個未逆過? 逆過阿媽意，咳都要開冷氣飲凍檸樂; 同老闆拗到面紅面綠，死唔肯同個客講聲sorry; 甚至反過自己枱無數次，發過毒誓唔再走毅行但今年又準備入紙!

逆地心吸力

佬化不是必然

中年是中間發福怕曬攞住罐啤酒鬧政府的「佬化現象」。中學同學聚會，基本上是同一物種的同一演變，大家圍爐取暖你唔覺得有幾樣衰。記得有次聚會，見到個靚仔走過嚟同我握手，原來是當年坐隔離位的阿 Sam，佢穿 slim cut 開胸白恤衫，腹部沒有任何多餘的移民，閃亮亮黑拗拗的皮膚，包著結實而修長的身軀，神采飛揚。型!

雞公嶺上滿頭白髮的越野電單車手，知道佬化不是必然

回望自己，真係接受唔到囉!

問阿 Sam 點可以「搞成咁」? 他說4年前開始跑山，什麼毅行、元打火、九條龍，環大嶼都征服過。

係崎嶇不平的山路上跑? 走完100K? 點可能?

「可能! 只要你唔想變成一個佬!」阿 Sam 壓低聲音同我講，因為四周圍有廿幾個佬，起勢係度劈啤酒順便插林鄭。

可以唔變成一個佬?

一星期後，我跟住阿 Sam 操山，開始了我的逆之旅。黃龍坑上鳳頂、針草帽探蓮姐、陽明山莊去龍脊……，參加越野班操 hill repeat，強化 core、被放毒參加山賽 (竟然相信教練話愈長途愈舒服的甜言蜜語)、用千多元買件好似垃圾袋咁薄又話防雨又話透氣的風褸 (仲要話好抵)!

他們也操山參加山賽，都好逆下 (佛你跑大會相)

Why逆?

跑山有幾攞命、有幾八勞九傷、有幾犯賤……，唔駛我多講，亦未輪到我發言。總之一切都好逆身體，逆舒適、逆年齡。Then why 逆?

逆，可能因為唔抵得頸，唔認老、唔輸得、唔可以冇樽鹽、唔like條命……! 亦可能為一個目標，為一種堅持、為一份回甘，或者好簡單，我鍾意吖! 我相信每個人都有自強不息的本能，不用定一個高不可攀的任務，只要夠薑向「命運」下一封戰書，便刷到存在感，型爆!

家聯兄放毒，叫老人家參加接力賽，仲要疾走 攝: Sunny Leung@Run-pic

逆命運追巴士

前天去到巴士站，剛剛送車尾走左架6號巴士，我唔接受命運的安排，決定嘗試追一個巴士站，用雙腳挑戰四個轆 (仲要讓巴士一對皮鞋和一套老西)。沒多久就被巴士拋離，我沒有放棄，途中有兩個燈位，一盞綠，一盞紅，巴士停我唔停，追近了點，但很快又被甩掉，眼見還有約200米便埋站，我踩盡油門極限，開3分幾披 (家中小朋友不要學)，好彩巴士站有3個人上車，去到剛好到我! Yeah!

上車後感到快斷氣，挨住扶手在喘氣，好一陣子才攞到張八達通出來嘟，車長用奇怪的眼神望住我，佢在倒後鏡應該見到我追車，心諗:「阿叔你幾多歲? 學人追巴士? 好趕時間咩家陣?」我向佢做左個V字手勢，同埋開心左兩日!

我逆故我在!

後記

上個月的逆走100 Rebel Walker，是打正逆的旗號，倒轉頭行麥徑100K，其實冇乜大不了，都是山路一條，不過代表一份逆的精神。硬係要 make a difference!

「我以後唔玩啦!」- 出年見!

前日見到它們的 FB 有個逆走紀錄片慈善放映會(22/4) 的 post，睇過未剪輯完的毛片。片中記錄了幾位參加逆走100的選手，他們是慢腳，走100K是極度逆能力，鬥意志。四個年青人的目標是攞一條完成才有的「堅持毛巾」，見到他們在獅子亭有軟弱，但有更多的堅持；在水浪窩有猶豫，但有更多的信自己! 最終衝過北潭涌的終點，有大棵大棵的洋蔥!

與其圍燼取暖，自我感覺良好，不如另起自己的爐灶，燃點起每個人心中的逆之火!

Fitz連結: https://fitz.hk/?p=117462