利申

1. 聲明: No offense, 「死肥仔」呢個稱號,唔係講你、你、你,或者你,係講我自己! 我真名無人想知,總之呢幾十年來,人人係叫我做「死肥仔」。不嬲都係,只要你身型略胖,你就姓「死」名「肥仔」。

2. 呢份筆記係我呢幾個月以嚟,每次跑步所諗到嘅嘢。大多數係跑步嘅心得,亦有個人抒發,唔使 fact check,大家亦唔好挑機。因為全部都係我自己嘅經驗,大家信就信,唔信都無計。

3. 將呢啲筆記公開,係因為有一日中同聚會,同學F整晚眼金金望住我,搞到我差啲以為對我起痰,我驚到想入廁所著多兩條底褲。好彩佢適當時候問我: 「死肥仔,你係咪有絕症? 點解瘦得咁緊要?」

4. 我當然唔係有絕症,身體狀態相信係步入中年之後最fit。我只不過係開始咗跑步4-5個月,體重由80公斤減至60公斤左右咋。


5. 我呢20公斤體重,幾肯定係用跑步減番嚟 (除非我有隱疾)。因為我呢幾個月除咗培養咗跑步習慣之外,食嘅嘢同以前一樣,都係早餐食個沙嗲牛麵加杯凍啡,間中飲下可樂。食量因為有做運動而增加。而且呢個60公斤嘅體重,仲係維持咗大概兩個月都無變過。

6. 我想講嘅係,當你可以養成跑步習慣嘅話,其實可以解決好多健康問題。

7. 我整理100條跑步筆記,就係想大家可以培養一個運動習慣,減肥只係bonus。

8. 減肥有千百萬個方法,各有所好。不過我剩係試過跑步減肥,覺得work,就不妨介紹畀大家。大家如果覺得有其他方法仲好,亦唔使介紹畀我,你哋自己去試啦。

9. 想當日我失驚無神落街跑步,都係因為我好鍾意食丁麵飲可樂,喺唔想改變飲食習慣嘅情況之下,唯有改變作息習慣啦。

10. 重要嘅事講多次: 對我嚟講,減肥只係附加價值,我只係想同大家講講我養成跑步習慣嘅經驗。至於可唔可以兩個月減到二、三十磅,當中涉及好多因素。唔通我三十年前係長跑冠軍又要同大家講咩。

心態

11. 某年某月某日,死肥仔唔知黐咗邊條筋,晨咁早著住對無印良品運動鞋,落街用10分鐘一公里嘅步速,跑咗1.3公里。自從嗰日開始,發覺落街跑步都唔係一件困難嘅事,自始之後養成咗一個跑步習慣,隔得太耐無做運動,會周身唔聚財。

12. 做左肥仔幾十年,深深明白肥仔嘅姿整程度,同小白臉美男子不遑多讓。肥仔出街驚畀人望 (特別我呢啲中央肥胖,大肚婆身型),郁一郁成身汗驚臭到人,搭地鐵唔敢坐驚搞到隔離位好迫。所以最初要我呢條肥仔落街跑步,心理壓力好大,好驚被人笑。

13. 以前唔做運動,見到有肥佬喺街上跑步,心裏面都會笑佢跑唔郁,跑得咁辛苦為乜丫。

14. 不過後來發現,你就算跑10分pacing,慢過蝸牛,但條街根本唔會有人留意你 (除非你跑彌敦道),而只要你專心跑步,你只會留意自己呼吸,留意自己步伐,唔會得閒理外界嘅人和事。

15. 我都係普通人,最初跑步都好介意畀人望。所以我最初個幾月都只係喺緩跑徑跑,一走出緩跑徑即係扮演路人甲。

16. 對我嚟講,呢個心理上嘅難關係難搞過體能嘅不足。不過只要有決心去克服,其實亦唔係咩大問題。

17. 心態上仲有一樣要調整,就係跑步嘅速度。既然我穿上跑鞋嘅目的,唔係為咗要破紀錄,亦唔係為咗要跑完一場全馬,所以最初我連手錶都唔戴,跑幾耐跑幾快跑幾遠通通都唔理。要知道,肥人好容易因為激烈運動而受傷,而且太辛苦亦容易令人放棄。所以,慢慢來點都會比較快。

18. 用上面呢個心態,跑步時覺得辛苦,喘唔到氣,腳痛等等,不妨以行代跑。記住你嘅目的只係做運動,唔係接受操練,唔使搏命嘅。

19. 試過跑得太辛苦,會影響你之後嘅工作,個人攰到唔想做嘢。我嘅原則係做運動唔應該影響生活上嘅其他事。

20. 不過又唔好落運動場跑兩圈就當自己做咗運動。依照一般講法,每次做運動至少要做半個鐘,仲要出汗。所以嗰日就算我狀態好差,我行都行足半個鐘。

21. 補充一句,明白到要大家日日做運動係好困難,我自己都唔得。我大概一個禮拜兩至三日,試過跑得太密,會太攰甚至有腳痛。

22. 我幾十年嘅失敗經驗,越係煞有介事,越係容易失敗。所以,我跑咗咁耐,一直都無post facebook。

23. 直到有日有人突然同你講:「咦,你好似瘦咗 / 黑咗 / 精神咗……」嗰陣嘅痛快一定開心過 facebook呃到1000個likes。

(待續,我寫嘢好慢,唔好催我)

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告