本文提要: 步入中年，係時候要做番啲嘢令自己長命啲。衰在死肥仔最鍾意食丁麵飲可樂，唔想戒口之下，唯有落街跑步。就係咁，建立咗一個健康生活習慣，體重亦大幅減輕。 (下接第39條筆記)
> [死肥仔的跑步大全] 100+條跑步筆記 (一)
> [死肥仔的跑步大全] 100+條跑步筆記 (二)
買、買、買
39. 寫咗兩篇，有人覺得都只仲係前戲，未到戲肉。於是我問想要啲乜，佢答:「講裝備啦，香港人最鍾意買嘢架啦。」我駁唔到。唯有講下裝備啦。
----- 廣告 Ad -----
山友會上山搵發哥打卡，跑友都鍾意遇到林公子
40. 裝備一: 跑步手錶。對低端跑手來說，手錶肯定緊要過跑鞋，唔係我都唔會排頭位。手錶除咗可以記錄你嘅跑步歷程，用嚟鼓勵你之外，最重要係手錶嘅心率功能。你同我始終都肥仔 / 肥佬 / 肥B，做運動始終比其他人危險，值得買個保障。
41. 裝備二: 跑鞋。人人都話跑步係一項唔使錢嘅運動，著對運動鞋落街就OK。唓，班友一定係唔知百物騰貴嘅堅離地L，有啲跑鞋郁下都千千聲。不過，就算你好堅決要養成運動習慣，最初都唔使買對千幾二千蚊嘅「X%」。因為最初嘅目標都只係跑幾公里，又唔講求速度，呢啲情況只要啱腳型、著上去舒服就得，等你再跑耐啲自然會追求更加靚嘅跑鞋。唔使咁急買貴嘢。
42. 裝備三: 衣服。我最初跑步著衫嘅首要原則，就係「望落去唔似去跑步」。之前講過，死肥仔係怕醜底，去跑步好驚畀人笑，跑步時鍾意混入人堆中。所以我最初跑步都鍾意著到似行街: 普通Tee、行山長褲 (要束腳)、跑鞋。條街無乜人先起步跑，跑到多人就收慢扮追巴士。
幾年前Boris Johnson未做英國首相時，都係著成咁落街跑步。
43. 咁樣著夏天係會有啲辛苦，不過秋冬天氣就最適合。
44. 著到唔似跑步，咁去到運動場會唔會好怪相? 絕對唔會! 運動場連推BB車嘅大媽都有，驚乜呢?
----- 廣告 Ad -----
45. 到你可以持續跑步時，你自自然然會去買呢啲買嗰啲，呢方面唔使人教，都係香港人嘅專長。
唔做暴龍，要做速龍
46. 講個故事先。某一日我如常落運動場跑步。戴住 headphone 一步一步慢慢跑。就係跑到元神出竅，陶醉非常時候，前面兩位阿禪突然左右彈起，回我一句:「嚇鬼死咩，以為恐龍追住我!」
47. 阿禪一定無睇過《侏羅紀公園》，恐龍行路唔係隻隻都係 boom boom 聲! 喺廚房捉班小朋友嗰啲速龍，係行路無聲呀!
呢幾隻係速龍，專嚇小朋友
48. 不過呢兩位阿禪提醒咗我，跑步其實唔應該似暴龍，人未到腳步聲先到，而應該係似速龍 (唔係專捉女仔專蝦後生仔嗰啲) 即係話，跑步時唔應該係 boom boom 聲，最好有只係得 chit chit 聲，跑鞋鞋底同地下磨擦嘅聲音。
49. 我最初都無諗過跑步嘅聲音同跑姿嘅關係，我只係我啲腳步聲唔好嚇親人，that’s all. (後來發現腳步聲同受傷有關，遲下再講)
50. 利申: 我無學講跑步，無參加過跑班，我堅唔識 (亦唔敢) 去教人跑步。
51. 呢篇文教嗰四個練習方法好有用，可以幫你減輕腳步，我都試過。《中移動都建議你做Speed Runner》
待續，仲有50條呀
> [死肥仔的跑步大全] 100+條跑步筆記 (一)
> [死肥仔的跑步大全] 100+條跑步筆記 (二)
----- 廣告 Ad -----
