上文提要: 步入中年,係時候要做番啲嘢令自己長命啲。衰在死肥仔最鍾意食丁麵飲可樂,唔想戒口之下,唯有落街跑步。就係咁,建立咗一個健康生活習慣,體重亦大幅減輕。 (下接第24條筆記)

一行禪師

24. 死肥仔讀書唔多,機緣巧合之下,睇過一行禪師嘅《怎樣走》,禪師講嘅大道理我唔多明白,只係好記得禪師講過一句: 「每行一步,其實係一種修行。所以踏步之前要做好準備,踏步時候就要留意自己每組肌肉,每條骨骼的移動……」(大意)

25. 呢個道理可以用喺跑步上。我唔係跑步教練,講步姿講步頻我真係識條鐵。不過喺我跑步嘅過程裏面,越集中精神越畀心機嗰一日,就係跑得最舒服嘅日。我諗呢啲就叫狀態好啩。

26. 一行禪師將日常生活視為修行嘅一個途徑,我哋亦可以將跑步視為生活上嘅一個突破。

27. 跑到一場馬拉松可能係一個好大嘅成就,但對我而言,可以一個禮拜跑三日,keep住一年、兩年都無斷纜,肯定比馬拉松sub乜sub物更加巴閉。

28. 所以,決心要落街跑步前,第一件事唔係揀邊對跑鞋著邊件跑衫,而係問下自己跑步想達到咩目的先?

29. 我記得我跑完第一日,就同自己講: 「我聽日要繼續跑!」 就係咁,開始咗我嘅跑步習慣。

30. 有人話: 一個行為持續做30日就成為你嘅習慣。如果一個禮拜跑三日,你只要堅持一個月,即係跑12次,就可以將跑步變為你嘅習慣,真係容易到不得了。

要我搣甩一丁,咁我情願跑步。(識得食一定食日本版)

計劃

31. 將一件事成為習慣,最好有一個固定時間。對一般打工仔來講,跑步嘅時間不外乎朝活、晚練。兩個時間我都試過,我試下將我嘅經驗分享一下。

32. 朝早跑: 好處梗係空氣清新、街上人少啲、寧靜啲。而且跑完之後沖個涼,成日都會好精神。不過朝早跑要顧及之後嘅返工時間,有啲想跑耐啲都唔得,同埋有時公司有嘢做,會跑到心掛掛。

32. 夜晚跑: 可以搞掂晒公司嘢、屋企嘢,然後夜晚盡情做運動,當然夠晒輕鬆寫意啦。不過唔知點解我梗係唔鍾意夜晚跑,總係覺得天黑黑做運動無乜mood。

33. 最後我揀咗朝早跑步成為我嘅習慣,因為可以混入晨運嘅公公婆婆之中,就算嗰日跑唔郁,唔想跑,著住跑衫慢慢行,都唔會太礙眼。

34. 無論揀朝早揀夜晚,一揀好之後盡量唔好轉。

35. 路線: 之前講過,每一個死肥仔都係怕羞底,要佢哋肉騰騰喺街上跑來跑去,確實需要一番勇氣。所以最初,我選擇喺運動場踏出第一步。一來喺運動場人人都專心做運動,你搞咩無乜人理你。二來幾十年無做運動,好驚自己會突然昏低、拗柴,甚至暴斃,到時搵救兵都容易啲。

35. 跑街: 跑街嘅好處就係可以「潛伏」於路人之中,然後行到偏靜地方,即係化身跑友,開始跑步。我最初去跑步好驚畀人知 (包括樓下管理員),都試過用呢個招數,不過無幾耐你會開始唔介意人哋嘅睇法,跑街跑運動場都已經無乜所謂。

36. 跑街嘅路線,盡量keep住要固定,方便可以睇到自己嘅進步,有番啲鼓勵咁啦。

37. 你可能聽過香港有好多好靚風景嘅跑步路線,好似話荃灣嘅青山公路,九龍灣啟德機場,中環摩天輪等等。不過,最好嘅路線都係揀你屋企 (或公司) 附近,免卻不必要嘅交通。

38. 記住記住: 件事越變得輕鬆越變得自然,你就會越少藉口放棄。

(待續)

上篇: [死肥仔的跑步大全] 100+條跑步筆記 (一)


文章為作者意見,不代表Fitz立場。

歡迎投稿: http://fitz.hk/contribute/