無錫馬拉松
無錫馬拉松2020,起步拱門有 ASICS 商標,選手著嘅粉紅色背心亦由 ASICS 贊助

新疆棉事件引發內地民眾抵制國外運動品牌,最新發展係有中國大型運動賽事加入戰團,公開同呢啲國外品牌中止合作。4月11日起步嘅無錫馬拉松,於賽事網站發出公告,話要同贊助商 ASICS 中止合作協議,取消派發由 ASICS 贊助嘅選手包。

中央電視台3月24日指瑞典品牌 H&M 抵制新疆棉花,係「吃中國飯砸中國鍋」,其後火勢蔓延至 Nike、Adidas 等外國品牌。ASICS 3月25日於官方微博發表聲明,話支持新疆棉。三日後呢份喺微博嘅聲明被刪,總公司並澄清聲明不代表官方立場,ASICS 隨即成為內地民眾攻擊對象。

ASICS聲明
Asics 於3月25日在官方微博發表聲明,期後被刪。

呢個情況之下,無錫馬拉松賽事運營公司「無錫匯跑體育」,4月1日中止同 ASICS 嘅合作,並停止派發有 ASICS 產品嘅選手包,參加者仲可以選擇全數退回報名費,同時承諾三個月內補寄回紀念品。。由於賽事於4月11日舉行,總共有27,000人報名,相信佢哋無乜可能搵過另一個贊助商,而家單方面中止合作,大會應該都會同陳奕迅一樣,需要賠償違約金。

隨著中國大陸聲稱疫情穩定,生活如常,各省市嘅長跑賽事於4月陸續展開,4月份將總共舉辦超過30場馬拉松。而家無錫馬拉松同 ASICS 割蓆,其他主辦單位應該都相當頭痕,係咪要效法表忠了。

資料: 新浪網


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 無錫馬拉松起步前夕 與ASICS中止合作