參加者只能用吹爛晒嘅保溫氈取暖擋風

甘肅省白銀市5月22日 (星期六) 舉行「黃河石林山地馬拉松百公里越野賽」,期間遇上極端惡劣天氣,21人死亡,包括著名跑手梁晶。呢次堪稱歷來中外最嚴重長跑比賽意外。

意外發生後,中外媒體深入描繪賽事情況,包括多篇跑手及親友發表嘅文章。我哋編輯部整理了相關報道,希望盡力還原事件,令比賽機構以至跑手,都可以汲取教訓。

1. 完賽獎金鼓勵跑手搵命博?

賽事報名費1000人民幣,不過賽事完賽獎金至少1600人民幣,名額400名。最後參賽者有172名,所以只要上咗起跑線,完成比賽就可以賺到600蚊。至於排名1至10名跑手,更可獲15,000至2000人民幣不等。

呢個獎金制度,令參加者都有好勇鬥狠嘅心態,賽事期間遇到意外,都唔會輕言放棄,間接令今次意外更嚴重。

2. 參賽門檻低,比賽要求高

意外發生後,主辦大會向媒體解釋,話只招收有經驗跑手參加。佢哋無講大話,不過主辦大會無解釋詳細解釋「參賽門檻」。呢項比賽只要求參加者:

  1. 1年內跑過兩場全馬,或;
  2. 1年內完成一場50公里或以上越野賽

大會對時間上無要求,即係話6、7個鐘完成馬拉松嘅「年度跑手」,或者十幾二十個鐘完成50公里嘅「 越野新手」,要報名參加呢場比賽賺600蚊,其實唔難。話雖如此,但賽事實際難度其實一啲都唔嘢小:

按圖放大
  • 距離: 100公里
  • 賽道海拔: 整體於2000米左右
  • 爬升: 約3000米
  • 限時: 20小時

跑手要喺海拔2000米以上作賽,相信對低海拔地區生活嘅跑手 (如香港) 有一定難度。而跑手最大礙障,就係比賽限時20小時。多位參賽者及越野跑專家都表示,以比賽嘅要求嚟睇,好多參加者為咗符合呢個限時,都會冒險採取「輕量化」策略,將隨身裝備大為減少,以求提升比賽速度。到天氣突變,有意外發生時,身上嘅裝備就不足以保命。

3. 主辦大會臨時換人

化名「流落南方」嘅參賽者,退賽被救後發表文章,講述親身經歷。對於主辦大會,佢有咁嘅描述:

「今年的比賽,賽事公司沒有變,但21日晚技術會,發現講解賽道的賽事總監換人了,一些組委會工作人員也是新面孔。………  並不是官方參與度高,賽事就一定是好賽事,這個,有過比賽經驗的朋友都了解。…… 然而今年,肉眼可見一些細節,比如賽道布標,感覺黃河石林這個比賽槽點變少了,組織工作更細膩了。但偏偏就是今年的比賽出了問題,而且是大問題。問題出在天氣上,極端天氣。甚至521這天的天氣預報,都沒有預報出來第二天的這種極端天氣。」

「流落南方」話呢項賽事已經舉辦四年,之前嘅賽事公司都甚有好評,不過今年卻陣前易帥,暗示引起混亂。例如主辦大會無向跑手講及天氣突變嘅問題,不過睇返當地氣象局報告,話:

「21至22日甘肅省有一次大風沙塵、降溫降水天氣過程…… 注意防範短時強降水、冰雹、雷電、陣性大風等不利影響。」

亦即係話,該地天文台已經作出天氣提示,不過主辦大會就似乎無同跑手提過。

起步當日朝早,氣溫大約15度天晴,有跑手見到天氣唔錯,反而驚下晝太曬,而換晒短衫短褲,以免中暑。

4. 防水風褸唔係必要裝備

另一個極受爭議問題,就係大會今次於賽事規定,取消防水風褸為「必要裝備」。大會只係強制要求跑手帶備基本裝備,例如保溫毯、救生哨子及一個 GPS 裝置。

上面講過,唔少跑手為求造出好成績,會減少攜帶裝備,所以當大會取消防水風褸為必要裝備,又無提示有天氣轉變時,跑手眼見天氣唔錯,都樂於將風褸放入寄倉行李中。就好似參加者「流落南方」,佢將風褸放入寄倉行李,諗住 CP6 (62公里) 入黑後先會用到。

亦因為咁,當天氣於 CP3 (32公里) 附近突變,絕大多數跑手都難以抵擋暴風冰雹大雨,身陷險境。

5. 係天災定人禍?

受難者女兒公開發文表達對大會質疑。發文者話佢爸爸喺比賽期間失踪,後來於微博短片裏面睇到爸爸狀況,睇到佢當時不醒人事,口吐白沫,其後收到爸爸死亡嘅消息。死者女兒質問:「是誰敷衍了事的安全工作,那就誰來承認錯誤,是誰做錯了,就出來受罰,是誰有觸犯了法律,在那些我們看不到的灰顏色地帶有些什麼秘密,請該坐牢的坐牢。」

我哋明白越野跑賽有一定風險,亦明白參加者本身亦要對意外要有一定準備。不過當參加者報名參加一項比賽,其實亦係投以主辦大會信心一票。呢個情況下,主辦大會有無盡最大責任肩負參加者嘅安全呢?

好多問題,希望最後可以得到解答。願死者安息。

補充: 172名參加者全部中途退賽,而主辦大會,係中共甘肅省白銀市人民政府。

官方媒體新華社圖片。呢輯相影到搜救隊相當威武,圖片睇唔到任何一位參加者。

資料: 網易英國衛報新華網蘋果日報搜狐立場新聞錢江晚報


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 甘肅百公里越野賽21死慘劇: 跑手於2000米海拔經歷了甚麼?