生命的遺憾,離不開錯過和不懂珍惜。

因怕被嘲笑不自量力,始終不敢向女神表白,錯過一段可以開花的愛情。騰訊100蚊冇入,匯控100蚊冇出。好不辛苦儲夠分數又被抽中參加UTMB,卻因疫情不能踏足。錯過,因際遇因性格因天時,只怪不被上天眷顧。

不懂珍惜多是自己的任性和浪費,曾經有一段真摯的愛情 (或親情) 擺在你面前,你卻沒有珍惜,亂發脾四,直到失去才追悔莫及。總以為青春是無限賞期,年輕時 hea 頹廢地度過;有機會接個大 project 又不盡力做好;天生繪畫巧手、有對快腳、天使的聲音,卻沒有好好把握努力找個平台發光發亮,浪擲上天的禮物,成為莫大的遺憾。回看如果那時懂得珍惜,生命可能是另一遼闊的天地。

三年前誤打誤撞入了跑班,記得上第一堂要做 2.4K test,所做時間會與最後一堂比較,看看有多少進步。教練叫我地唔好偷雞專登慢跑製造進步,我十分聽話,拼老命去跑,時間是12’40”,注定B組腳。那時我冇運動錶,靠教練報時,亦不知什麼是 pacing,只知跑完像斷氣想嘔,我好肯定無論點操法,無可能跑得更快。

塵世間有什麼事情會比衝圈更懷疑人生? 攝: [email protected] Pic

整期跑班見到同學仔不論年齡,都超勤力衝 interval,跑 tempo,星期六跟教練去梅子林做長課,跑班每期都設有最佳進步獎,同學們都希望在最後一堂有好成績,搞到自己都罕有地認真上來。教練叫我試下做 sub-12,或者可以上A組跟跑。屈指一算,即係跑到4.x披,上A組雖然高不可攀,但又是一種榮耀(就係咁膚淺)。

最後一堂做測試時,心想進步獎於我如浮雲 (因為實冇份),但避免太樣衰,唯有死跟前面個同學仔,同時間我開始後悔第一堂的測試冇偷雞!結果跑出11’45”,快了接近一分鐘,亦是第一次跑進4分尾披,感動位是原來自己認真起來有啲料到 (唔好插住,自high下啫)!

我好想說:跑班不是個騙局!

我萬分之肯定冇跑步的天份,間中比賽都是陪跑湊湊熱鬧,偶爾在冷門賽事兼有高年紀的分齡組中跑進前三,竟然有機會上大台 (有時前六名都有獎),呃左少少 like 同 high 左幾天,十分感激這些有愛心的主辦機構! 我五、六把年紀,路跑山賽不會是什麼人生目標,但比賽令人認真起來,才知自己有啲嘢隱藏著未被開光。

PB Run是其中一間有愛心的主辦機構,前6名都有獎

身邊的朋友,漸漸換成了一班年輕熱血的跑友 (就算唔年輕但一定熱血),他們開口披醒,埋口里數。魂牽夢迴是做到 sub sub 聲的 sub-40(10K)、sub-330(全馬)、sub2-0 (100K)…,為了這些 sub,他們花二千多元買對炭板鞋 (好可能是全屋最貴的一對鞋)、四百幾蚊買條T8 (老媽子叫它做波褲真不夠尊重),最重要的是他們不停的定目標,達到了又再追更高的PB,唔攰嘅咩?

問世間,PB為何物? 直教心力相許。PB 是 Personal Best,它解答一個很重要的問題:老老實實你究竟有幾勁? 我的平板PB是8分鐘,足夠我在同齡朋輩中耀武揚威 (又唔好插住,我的 friend 數目好少)。有次去科學園參加10K賽,金蛋附近有數個做運動的攤位,其中一個是平板比賽,免費參加,任可人都可以嘗試,只要打進排行榜的頭三位,便送上無線藍牙耳機。

又靚仔,姿勢又正確,當然唔會係我

排行榜暫時第一位是18’02”,第二、三是11’24”和11’15”,一看心裡冷了三截,才發現我的PB講出來只是個笑話,去挑戰會唔會變成同大迫傑鬥快。但回心一想同第三位只差三分幾鐘,不是沒有可能,最重要的是免費和輸了冇人知,於是膽粗粗埋位參戰。

做到第9分鐘我勉強應付得來,進入第10、11分,身體開姑顫抖。「先生你OK嗎?」旁邊做計時的小姐說。直譯是:大叔,唔掂咪死頂!

我就係要死頂,其實時間已超越了第三名,但覺得不夠安全,因後來者好大可能也是衝著第三位的時間而做。我忽然好有鬥心 (為了藍牙耳機),要盡做! 到12分、13分,四肢都在震盪和震怒! 結果是13’01”我才伏屍地面,PB了,並進佔第二位!跟住去路跑比賽,跑完回來一看,果然被人以13’06”超前,但幸保第三,Yeah! 捧著藍牙耳機回家,已忘記了剛才10K跑幾多時間!

當時的笑容肯定更燦爛10倍
每次看見都覺得比初戀更甜蜜

上篇文章《送鼠迎牛玩大左》,見證一位60+婆婆和一位50+嬸嬸,在九天內要與其隊伍鬥快爬升合共18600米,走70K路。挑戰她們的年齡極限,過了第二天她們真心覺得玩大左,carry 唔到。但仍盡力做好每天的任務,結果得第五名 (沒有分齡)。她們常說:人不瘋狂枉老年!

生命不會有遺憾,如果你曾經好認真地不自量力,就算最終真的不自量力!

圖片來源

文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > 生命的遺憾