8月9日,來自英國埃塞克斯 (Essex) 嘅 Andy Wilmot,以4小時53分完成當地一場馬拉松比賽。以一位76歲長者來講,呢個成績當然OK,不過更重要嘅係,呢場係佢人生第800場馬拉松,意義重大。

800場馬拉松,即係33,000公里,大約地球圓周五分之四。

人人都睇死佢

Andy 嘅故事,可以由2014年講起。當年佢踏入70歲,每年平均跑30次馬拉松,喺人生第712場比賽,以4:14:46贏得70歲年齡組別冠軍後,唔少人都覺得佢年紀咁大,仲要跑得咁密,一定唔可以繼續落去。不過 Andy 就唔理其他人點講,跑下一場跑下又一場,到今年終於達到800場呢個紀錄。

唯一可惜嘅係,原本佢計劃喺倫敦馬拉松完成呢個壯舉,而家因為疫情唯有參加其他賽事。

Andy完成第700場嘅時候,未夠七十歲。

馬拉松引人入勝

Andy 話佢鍾意長跑,唔係因為容易,而係因為夠挑戰性。

「我唔鍾意短途賽,太快結束! 跑馬拉松去到末段,雖然會好辛苦,身體每一個部位都好痛,但呢個身體同精神嘅挑戰,正係呢項運動嘅魅力所在!」

完咗比賽,Andy會同跑會朋友BBQ

近年 Andy 亦感受到歲月催人,好似話佢比以前更加怕凍,訓練時間亦因體力回復情況變差而減少。所以佢近年已開始寓賽於操,希望可以跑多幾年。佢話每次比賽都會碰到熟悉嘅面孔,參加比賽就好似同朋友聚會。

而家 Andy 嘅計劃,係可以完成900場馬拉松,到時總距離可以超過地球一周37,000公里。

資料: Metro


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。