[老當益壯] 76歲英國伯伯完成800個馬拉松 跑足33,000公里

8月9日，來自英國埃塞克斯 (Essex) 嘅 Andy Wilmot，以4小時53分完成當地一場馬拉松比賽。以一位76歲長者來講，呢個成績當然OK，不過更重要嘅係，呢場係佢人生第800場馬拉松，意義重大。

800場馬拉松，即係33,000公里，大約地球圓周五分之四。

人人都睇死佢

Andy 嘅故事，可以由2014年講起。當年佢踏入70歲，每年平均跑30次馬拉松，喺人生第712場比賽，以4:14:46贏得70歲年齡組別冠軍後，唔少人都覺得佢年紀咁大，仲要跑得咁密，一定唔可以繼續落去。不過 Andy 就唔理其他人點講，跑下一場跑下又一場，到今年終於達到800場呢個紀錄。

唯一可惜嘅係，原本佢計劃喺倫敦馬拉松完成呢個壯舉，而家因為疫情唯有參加其他賽事。

馬拉松引人入勝

Andy 話佢鍾意長跑，唔係因為容易，而係因為夠挑戰性。

「我唔鍾意短途賽，太快結束! 跑馬拉松去到末段，雖然會好辛苦，身體每一個部位都好痛，但呢個身體同精神嘅挑戰，正係呢項運動嘅魅力所在!」

近年 Andy 亦感受到歲月催人，好似話佢比以前更加怕凍，訓練時間亦因體力回復情況變差而減少。所以佢近年已開始寓賽於操，希望可以跑多幾年。佢話每次比賽都會碰到熟悉嘅面孔，參加比賽就好似同朋友聚會。

而家 Andy 嘅計劃，係可以完成900場馬拉松，到時總距離可以超過地球一周37,000公里。

資料: Metro