位於荃灣西鐵站側的荃灣體育館,於2018年10月11日正式開幕。呢個體育館座立於青山公路長課嘅起點,由荃灣海濱公園起步,可一路跑入屯門。所以體育館未開幕,各方跑友都可以蓄勢待發,視體育館係練長課基地。打算將行李放喺體育館,就可以跑完步拎返行李,然後有個地方沖涼換衫。

不過,有跑友喺體育館開張之後隨即去幫襯,就被人拒諸門外。佢話去到問職員借 locker,一問之下,原來館內設施只供租場人士使用。事件於網上發酵,有人話館方依足守則做嘢,無得反駁。但有人又話其他場館都可以借 locker 跑步,覺得呢個新場館太過不近人情。

筆者就住呢件事,專登走入荃灣,實地視察呢個體育館可唔可幫到大家練長課。

體育館男廁內的 locker

租場紙,唔該!

筆者向兩位跑友了解情況,得到截然不同的結果:

跑友A君向櫃枱職員借 locker,職員隨即話:「你係咪租咗個場打波呀? 有無租場紙?」A君表明自己無租場,只係租個 locker 跑步。職員就話要場紙先借得 locker,無場紙無得借。


B君情況有啲唔同,職員雖然都有講過無場紙唔借得 locker,並解釋因為地下 locker 較多人使用。不過職員最後仍然畀咗個一樓 (乒乓球室側) 嘅 locker,話嗰層樓嘅 locker 比較少人用,借一陣畀佢無問題。

究竟借得定唔借得? 不如睇下張貼於 locker 側邊嘅使用守則:

按圖放大

守則第8項清楚表明:

由於本場地貯物櫃的數量有限,故只借場地租用者於租場時段內使用。

香港人,唔似某些國家人民,對於法理觀念,都應該好明白。咁上面呢兩句守則寫得咁清楚,其實都唔使點拗啦。

至於有人借到有人借唔到嘅情況,其實係人情味嘅體現。直接啲講,就係畀你係人情,唔畀你係道理囉。

locker可加上鎖頭

場館使用量頗高

場館職員講過,如果借晒啲 locker 畀街外人,租場人士無得用! 粗略估計,地下及一樓加埋,男女廁共有150個 locker 左右。而筆者在星期五下晝三點幾到訪,經過抽樣調查,地下男廁 locker 十個當中,只找到兩三個沒有上鎖。使用率達七至八成。如果在晚間或假期,相信使用率一定更高。

所以,站在場館管理嘅角度睇,亦無理由借 locker 畀出街跑步嘅人士。

海濱公園辦事處,內裏有廁所、更衣室及儲物櫃

350米外的合法儲物櫃

正式來說,體育館外的範圍屬荃灣海濱公園。由體育館沿海往南行 (青衣橋方向) 約350米,就是海濱公園辦事處,該處有更衣室,並有數十個公眾儲物櫃,可供緩跑者借用。

海濱公園的 locker
使用守則相對簡潔
海濱公園嘅緩跑徑

大家都是 locker 不用分那麼仔細

說話回頭,體育館嘅 locker 同海濱公園嘅 locker,都係借畀市民放嘢,其實點解要麻煩市民要行多幾百米呢?

諗深一層,如果康文署係鼓勵市民做多啲運動,而且既然用納稅人嘅錢,起咗咁大型嘅體育館,點解唔整多啲locker? 你話驚管理麻煩,咁索性要大家自備鎖頭 locker,連鎖匙都唔使問你哋借,我哋自己搞掂就得。(驚畀人濫用,咪每晚收工清一次囉。)

康文署網頁 (荃灣體育館)

Fitz連結: https://fitz.hk/?p=105313


更多:
Fitz Facebook 專頁
香港運動比賽時間表
Fitz 跑步 Running

廣告
張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。