中槍緊要過PB
眾所周知,每一個參與本地或海外賽事的跑手朋友都希望有返十張八張靚相留念,可以放上Facebook或IG呃返幾百個like!但可惜好多時都事與願違,搵嚟搵去唔係冇相就係影得勁樣衰囉!你估我唔想中文星大師槍咩?可惜俗語有云︰【此星只應天上有,為何留落到人間!】小弟大大話話都跑過唔少本地賽事,咁耐以嚟只係有幸喺味精濃半馬賽事中過文星大師一次槍咁大把!

小弟有幸唯一一次中文星大師

究竟點先可以增加中槍率?我認為除咗係靚女,即係好似San San,蝦嫂或者烈敏呢啲特別吸晴者之外,就一係要奇裝異服啦!但可惜我唔太鍾意變裝跑,於是我問咗我一個中槍率奇高又願意上鏡嘅朋友譚先生應該點做。佢嘅方法就係當你老遠見到相機,就要做動作,而且要keep住4、5秒,因為你唔會知攝影師用緊乜鏡頭及那一秒按快門,甚至有D攝影師會玩「連拍」的,搞L掂!明晒!即係中槍緊要過PB啦!我下次試下先!

好友大將軍與娘娘成功於今年渣馬大量吸晴,事後仲即場求婚成功,恭喜晒
中槍緊要過PB的譚先生



裝備L是如何練成的
喺探討呢個課題之前,我要先介紹裝備L嘅代表譚小姐比大家認識,譚小姐佢係我第一個長課partner,亦都係第一個導我玩山菜嘅朋友,咁玩得山菜,山鞋呀,水袋呀,行山杖呀呢啲基本裝備就一定唔少得啦。但大家知啦,呢啲裝備閒閒地都一千幾百一件,加加埋埋都幾千銀,有時真係肉都痛咖,但譚小姐嘅格言係一千幾百,尤如垃圾,所有裝備都係值呢個價咖!雖然佢成日堅稱自己係一個窮L,但佢啲裝備真係多到一個點!正所謂天生我才必有用,但佢啲裝備就天生我財比啲你用都仲得!

全副武裝的裝備L譚小姐

運動對香港冇貢獻?
曾經有條凸首講過話運動對香港冇貢獻,計我話如果香港搞多啲比賽,呢班裝備L嘅消費能力簡直可以照起大半個香港嘅零售業,到時睇佢仲夠唔夠薑再話運動對香港冇貢獻哎嗱!今次講住咁多先,下次再同大家吹過!

更多:
Fitz.hk Facebook專頁
[親身實證] 唔跑唔知身體好!
[親身實證] 變都樣埋 當阿Bob遇上森美
跑比賽 要知道的二三事
[日本三連馬之一] 京都馬,終於成功完走
Fitz Running 跑步

分享
路加利
由一個超過二百磅的死肥佬,一公里都跑唔郁,到而家一百五十幾磅,跑咗幾次半馬,幾次全馬,一次57公里圖騰跑。透過跑步認識咗好多唔正常的院友,亦希望透過跑步去影響身邊所有的人要注意健康。 聯絡:[email protected]