[親身實證] 唔跑唔知身體好!

 

續上篇《[親身實證] 變都樣埋 當阿Bob遇上森美》

每個人都有佢自己跑步的理由，有啲人係想減肥，有啲人想強身健體，有啲人想挑戰自我。但呢種心態係會隨住越跑越多而有所改變。

點解要跑步
我起初想跑步嘅原因一定係想減下肥同身體健康，但跑步呢種病好奇怪，跑下跑下就會好多嘢諗，諗下點樣先可以令自己跑快啲，點樣可以跑耐啲長啲？尤其係當你病入膏肓嘅時候，更加會做好多傻事，例如一條友無啦啦會走去青公索返廿幾三十K都係等閒事。好彩我家獄長深明大義，我啲批文從來都係即批。到咗家陣，已經去到一個星期點都要跑返幾日嘅情況，月索二三百K已經成為習慣，慢慢就更加能夠配得起院友呢個名。

跑步從來冇分對與錯，只有愛與不愛，當你愛上咗佢之後，人會變得瘋狂！XD！從前我會告訴你我係為咗健康所以去跑，家下我會告訴你我係為咗可以繼續跑落去，所以我要健康！

跑步從來都係一個人嘅事
雖則話跑步最緊要有海景同有院友啫，但我始終都覺得跑步係一個人嘅事，無論背後有幾好因素去支持都好，始終你唔換衫，唔換跑鞋，一切都係嘥氣。所以我好認同好朋友D小姐同我講過嘅一句說話︰心動不如立即行動啦！只要你肯走出你身處的comfort zone，出去好好自虐一番，我很肯定你一定會體會到不一樣嘅 人生。記住，跑步從來都係跑自己，唔好同其他人比較。除非你係非洲藉選手啦！

下次再同大家講下跑步的二三事，就係<裝備L是如何練成>同埋<中槍緊要要過PB>……

(待續)

更多：
Fitz.hk Facebook專頁
[親身實證] 變都樣埋 當阿Bob遇上森美
跑比賽 要知道的二三事
[日本三連馬之一] 京都馬，終於成功完走
Fitz Running 跑步