Fitz > 運動 Sports > 跑步 Running > 賓叔叔唔跑得齋講跑系列 (七) | 用跑步對抗中年危機

續上篇:《跑步可導人向善,治療奇難雜症

唔跑得步 講阿叔跑步

中年阿叔之所以選擇做一件跑步大叔操 Fit 副偈,其實原因好簡單,宣之於口嘅表面動機係為咗健康同減肥,深藏不露嘅實情係用雙腳對抗中年危機,以身體變化身材改變,揾番自己嘅存在 …….

  • 你後生過我?
    喂,我跑得快過你喎!
  • 你架法拉利靚過我嗰架本田?
    喂,我 Fit 過你喎!
  • 你事業成功過我叻過我有米過我?
    喂,我跑得快過你喎!
  • 你戴地通拿我戴 G-Shock?
    喂,我 Fit 過你喎!
  • 你係馬會會員我係南華會會員?
    喂,我跑得快過你喎!
  • 你靚仔過我高大過我?
    喂,我跑得快過你喎!
  • 你好多女仔吼我淨係得仔女吼?
    喂,我 Fit 過你喎!
  • 你乜乜過我物物過我?
    喂,我跑得快過你 Fit 過你喎!
(乜乜 同 物物 可以無限延伸,歡迎自己填充!)

中年危機係一個牽涉生理同心理非常之咁複雜嘅問題,而相反跑步係一個好簡單嘅舉動,只要你肯跑,只要你用心跑,搵啱方法去練習跑,你一定會進步,進步多少視乎你嘅努力與決心,塵世間最公平嘅嘢就係運動!

跑步大叔同後生仔富二代新發財最大嘅分別,可能係佢哋對鞋二三千蚊你對一千幾百,但再好嘅裝備都未必敵得過努力與毅力! 跑步練習其實好悶好辛苦,跑步其實係違反生理心理結構,特別係對後生仔,做人嘅目標係要舒服係要享樂,但跑步根本係攞苦嚟辛!而做咗幾十年人嘅跑步大叔幾十年嚟已經習慣捱苦,跑步需要嘅耐性同毅力通通有晒,而唔係年少青春嘅衝動同躁動!

每一個人都需要 Comfort Zone,中年阿叔尤其需要,跑步大叔嘅 Comfort Zone 就係喺跑步嘅時候,阿叔好似不斷向前跑但其實享受緊停留喺跑步中嘅結界!結界中阿叔們感受到存在兼且非常實在,仲使身處一條紛擾嘅馬路,喧嘩嘅跑道之上,但都會感覺寧靜感到熟悉感到自我!

係咪好阿 Q 精神?係!阿 Q 到不得之了無與倫比,但做一件自我感覺良好嘅 阿Q 大叔 ,又何妨?成日有人話男人嘅浪漫就係豆腐火腩飯,太膚淺嘞!

消失咗嘅 C 先生話過:浪漫唔一定係詩情畫意,可以係一種性格一種生活方式一種心態,甚至簡單啲係一種行為,重點係浪漫嘅行為唔係刻意營造出嚟,而係隨心而發嘅自然反應,小至靜靜雞睇本書,大至嘈嘈閉追尋人生目標都可以浪漫!

跑步大叔其實唔係用對腳去跑,係用個腦用個心用個靈魂去跑。跑步大叔證明咗男人嘅浪漫除咗豆腐火腩飯,仲可以係 “ 我係阿叔,但我跑得唔太慢!”

唔跑得步 講下飲唔飲得酒跑步

因為姣斯躉篤要著衫好睇,唔著衫仲好睇,加上跑步同三鐵都要 keep 住副偈,就算唔使 Fit 到爆 Lean 到極,都唔可以有腩有士啤軚,所以叔叔長期都揀飲擇食,但因為最近日日兩至三課,試過第一課之後又倦又無力,幾乎游游下水都想瞓覺,同好 Fit 嘅教練商量檢討之後,發覺應該係我食得太少太清,於是調整飲食,包括食番多少少炭水化合物同蛋白質,發現真係有番力去應付第二課,當然太唔健康嘅食物例如即食麵,油炸食物,反式脂肪速食品,高糖份飲料等依然都係少碰為妙。

唯有一個少少不良嗜好,明知對運動表現多多少少都有影響,而又 keep 住唔改嘅,係飲酒。

我鐘意飲酒,但當然唔係酗酒,夜晚黑煲劇一兩杯而已,飲酒對耐力運動,從身體機能角度睇,係人都知應該唔係好事。所有鍾意酒嘅運動人都清楚,昨晚飲多咗,今日狀態一定差少少。耐力運動消耗大量體力,運動員須處於高狀態,賽前飲用酒精無可能係一件好事,唔需要學術研究證實,所有飲過酒嘅耐力運動員,對酒精同運動嘅關係,都雞食放光蟲,心知肚明。所以比賽之前我一定戒酒,半馬一星期,全馬兩星期,70.3 一個月,229 起碼個半月至兩個月。

飲酒本身對運動已經唔好,飲酒附帶嘅餸酒食物,對運動更加有負面影響,花生,薯條,炸雞翼,Nachos,爆谷,串燒乜串燒物……雖然好食,但冚嘭唥係不健康食物。飲酒時食嘅東西,在營養師眼中,直情係垃圾。

我問過我教練,知名教練 W 師傅,咁我使唔使完全戒酒,W 師傅施施然喺 Pull Up Bar 對落,成推 Kettlebell 傍邊個雪櫃仔度,攞咗兩支細支裝 Sapporo Premium Beer 出嚟同我一人一支,再同時谷一谷指一指佢 4% BFR 嘅腹肌同我笑一笑,我又笑笑口答: 明白!

最多人認同運動同飲酒嘅塲面,唯有一個例外,就係強勁操練或者長課完畢,特別係比賽之後,運動員獎勵自己同隊友嘅方法,通常係飲酒。唔少人甚至認為,辛苦中支撐落去嘅動力,係諗住跑完可以大飲特飲。運動同酒可以大模私樣出場做朋嘅時候,係運動之後,特別係大賽之後,你試下喺 226 終點,周圍嘅人都揸住杯啤酒喺度飲,不知幾爽!既然辛苦咗一大輪,最後希望同一班隊友衝線後對番杯,喺運動塲地光明正大地咁暢飲,何其快哉!

唔跑得步 講下減肥

叔叔作為一個曾經百九幾磅嘅死肥佬,今日講少少天下間最容易嘅事,減肥…

齋靠運動係減唔到肥嘅!

  • 減肥係要持之以恆唔好三分鐘熱度,減唔難,Keep 先難。
  • 齋靠運動係減唔到肥嘅!
  • 節食唔係減肥嘅好方法,揀飲擇食先至係。
  • 齋靠運動係減唔到肥嘅!
  • 食素唔係減肥嘅方法,你無見過和尚師姑有肚腩咩?
  • 齋靠運動係減唔到肥嘅!
  • 搣脂做機搖擺樂減到肥你都信,咁同信性交轉運分別不大。
  • 齋靠運動係減唔到肥嘅!
  • Sit Up 係練腹肌,唔係減肚腩。
  • 齋靠運動係減唔到肥嘅!
  • 減肥無得急無得一個月內減幾十磅,除非火化你,即刻得番幾安士灰。
  • 齋靠運動係減唔到肥嘅!
  • 減肥一定要瞓得夠。
  • 齋靠運動係減唔到肥嘅!
  • 想事半功倍必須向相關人事求教,唔好亂食減肥药。
  • 齋靠運動係減唔到肥嘅!
  • 飲酒唔係致肥主因,送酒嘅食物先係。

肥胖主要係生活習慣同飲食習慣嘅錯誤,成功嘅減肥必須改變錯誤嘅飲食習慣同生活習慣。

減肥嘅真正目標唔應該係僅僅減輕體重,而應該係減少脂肪,增加肌肉,補充營養,促進基礎代謝達至全面健康。

>

(待續)

「賓叔叔」雷彬冶文其他文章


文章為作者意見,不代表Fitz立場。
歡迎投稿: https://fitz.hk/contribute/