Fitz > 運動 Sports > 跑步 Running > 賓叔叔唔跑得齋講跑系列 (三) | 點解鍾意跑步? 一步一腳印,勝在夠公平

續上篇:《只要 Keep 得好,跑到衰老變衰佬!

點解鍾意跑步?
答案一字咁淺,公平!

現今塵世間不公平嘅事多到不得之了,求求其其諗下都可以舉例舉到你不舉……游泳冠軍精蟲投胎 KOL 教人唔好去日本唔好睇戲儲錢買樓! 一個二個欽點入局嘅乜議員物議員,日日喺度扮智將,慌死你唔知佢低智! 俄羅斯入侵烏克蘭,居然有咁多人覺得俄羅斯大條道理,包括阿邊個阿邊個同阿邊個! …… 不勝枚舉!

反之,跑步好公平,一步一腳印,揾啱方法去跑,避免受傷,付出幾多就得到幾多,勤力練習多跑一啲自然就見進步,肯付出自然有成果。

你會問: 「喂叔叔唔係喎,有錢買對靚鞋差好遠喎?」

喂大佬,問得呢句就知你睿智啦,幾好嘅跑鞋又碳纖又高科技又 3D 打印又乜又物,唔會令一個跑 Sub-4 嘅人突然間 Sub-3 ,快的多就無問題。

咁你又會問: 「喂叔叔咁有天份同無天份都差好遠喎?」

喂大佬,天份呢啲嘢屬於不可抗因素,近乎玄學,同議題無關,同努力與回報亦無關。

總之,喺咁多不公平氛圍之中,跑步嘅公平,甚至乎廣義嚟講運動嘅公平 ,係令我樂此不疲嘅原因。

完。

同場加映: 運動知識嘅謬誤

  • 仰臥起坐 (Sit up) 係練腹肌,同減肚腩完全無關係,肌肉還肌肉,脂肪還脂肪,等如七孔流血還七孔流血,死還死一樣。
  • 引體上升唔係練臂力,係練背肌,除非反手掘引體上升,就係練埋二頭肌,俯臥撑 (Push up) 就係練胸肌。
  • 節食唔係好嘅減肥方法,因為只會越嚟越餓,反而唔小心一破戒就狂食,儲存更多脂肪,因為身體唔知幾時再有補充,自動積谷防飢。
  • 瞓覺亦能減肥增肌,香港人經常睡眠不足,燃燒脂肪就會事倍功半,而肌肉生長唔係喺你舉鐵嗰陣時,係喺你休息嗰陣時。
  • 只跑步唔做肌耐力訓練,永遠都跑唔出有肌肉嘅好身材,而且容易受傷。
  • 女性跑步跑到死腿都唔會粗,跑完變粗只係暫時嘅充血發漲。
  • 局部減肥係偽科學,從來都無局部減肥呢回事,全球現在都無研究出局部減肥嘅辦法,局部增肌就有。
  • 想保持好身材就必須要有肌肉,有肌肉先會瘦,增肌減脂先係王道。
  • 女性只要妳咪鬼注射藥物,其實好難練成肌肉男,只會前凸後翹黃蜂腰曱甴肚。
  • 成日有人話唔去舉鐵做運動,原因係唔想咁太大隻! 但其實想太大隻唔係你想就得,要練得好甘食得好甘先得。個情況就係你話你唔想做地產經紀,因為唔想好似李嘉誠咁有錢一樣。
  • 乜乜物物話幫你體重快速下降嘅,減少嘅係你身體裡面嘅水份,唔係脂肪。
  • 跑步減脂請睇時間唔係睇距離,跑步前期消耗嘅係身體裡嘅糖,唔係脂肪,最好至少20分鐘以上先係燒脂。
  • 肌肉就係肌肉,脂肪就係脂肪,無食肥咗再轉化成肌肉呢會事,反而練脹咗再收番 Lean 就有。又係等如七孔流血還七孔流血,死還死一樣。
  • 平板支撐 Plank 練嘅係 Core 核心穩定性,唔係燒脂,你撐一個禮拜都燒唔到幾多脂肪,只會抽筋。

講住咁多先,再講應該會俾人打!
不喜勿插,898!

「賓叔叔」雷彬冶文其他文章


文章為作者意見,不代表Fitz立場。
歡迎投稿: https://fitz.hk/contribute/