開頭去跑山,係因為覺得路跑好悶! 圖: Alan 相對倫

好耐都無寫文,一來近期社會氣氛令我無乜心機寫,如果4點後寫既話,我怕我寫既會全部變晒粗口。 二來都想專心操練,所以都放低左枝筆一段時間! 但有一日有朋友問,跑山要快真係要練路跑?………所以就係度分享下我個人經驗。

想當年 (幾年前) 開始去跑山,係因為覺得路跑好悶,特別係運動場倉鼠跑真係頂唔順,真心佩服可以係運動場跑over 60 個圈既師兄們 (雖然而家我都係……)。所以我真心鐘意跑山多D,有風景,山徑變化又多,又多野食,又多GEAR買 (my favourite),又好似無咁chur…….etc

所以一直都比較抗拒練路跑,對於跑全馬亦可以無乜feel。哈哈

國敏一句: 其實有心肺就玩晒! 醒覺了。

但近年開始,發覺去到一個樽頸位,時常有種突破唔到既感覺! 之前,非苦隊長 Cap William 早幾年都叫我先操好路跑,再戰山頭。佢既武林小說式既比喻好好: 路跑就係內功,跑山技巧就係外功套路。好似張無忌,虛竹 *(唔識就自己google金庸) 你有內功打乜套路都勁! 相反,你無內功,只係識打套路,就好快俾人打死。

而之前,去玩柴古唐斯,同 Salomon china 隊友鄧國敏 (全馬229,ITRA 8xx) 傾計,佢分享佢一星期既訓練主要有5-6日都係運動場衝圈、Tempo,上山既日子只會1-2日! 佢好簡單咁講: 一切都係玩心肺!

當再 search 下好多國際大神多半係路跑出身,e.g: Jim Walmsley (全馬213), 祁敏 (全馬216),姚妙 (全馬235)……所以唔怪得人地點解可以14hours跑完100miles既 western states,9個幾鐘跑完100km既HK100!

感謝NSF 吳師傅既教導,令我心肺速度都提升不少

所以去年開始決心去強化路跑,就再加入跑班,最後入了 NSF 吳師傅*(前香港華人全馬紀錄保持者) 跑班操練,其間多得吳師傅既教導,令我心肺速度都提升不少,狀態亦大大提升,更係班中排位賽跑到二次第一,令信心提升不少。

增加了路跑訓練量後,2019 的成績得到成果

於去年山賽開始,多得路跑訓練量的增加,在幾個山賽既成績因此而提升。特別在10月份,編排了一個谷 peak 的30日6 Race的魔鬼賽程,全部有好好成績共2冠2亞2季* (J下先)。正正反映跑步是最誠實既運動,練左係會有回報的!

跑步是最誠實既運動,練左係會有回報的!

最後,跑山進步當然可以有好多方法,路跑亦未必係唯一方法。但係一個好有效既方法。好簡單,當你interval 衝到3:15 pace,全馬可以跑4:15 pace 既時候,叫你跑山既時間jog 6分pace 點會唔得?

仲有當你輕裝上陣既時候,就算對手有速龍咁快,但揹著20kg係身既時候仲點會追到你???

練跑啦首捉!


文章為作者意見,不代表Fitz立場。

歡迎投稿: http://fitz.hk/contribute/

壞人Ryan
八十後,現職某大型連鎖店之營運經理,自2011 首次參與毅行者後,漸漸愛上越野跑。參加過大大小小之香港路賽,山賽 (凡人一名)。講究裝備,正宗『裝備L』 一名。 堅持屎波都要架生多。同時亦熱愛足球, 死忠曼聯迷。