跑比賽
香港渣打馬拉松2017是我們的11馬。去年大雨水戰,我又唔爭氣,快唔到,拖累 honey。

對於未能拾科(sub 4),他一直耿耿於懷,遺憾在心!

今年天氣涼爽,絶對是百年一遇,係時候一雪前恥了!

阻人拾科,慘過殺人父母。呢次我唔敢搏,約定分開跑,終點見。

全馬挑戰組於早上六時十分開跑. 槍聲一響,我拍了 honey 一下膊頭,著他攞行李等我,他便在漆黑中跑走了。

我開著五分多披,自顧自跑。每次看家明,都不多於541. 541sub 4 披醒,唔多過就掂!

全挑雖然都多人(事後得知完成人數達3812),但路夠闊,跑手又有 manner,不會左穿右插,而且風大涼爽,都幾好跑. 上昂船洲橋頂的那段才是六分披,狀態真好呵。

我一路 keep 住披醒,汀九橋上見到 honey 在對面線,大家擊了一下掌,說了聲加油嘻嘻,佢都唔係快我好多啫!

今次除了八粒葡萄糖之外,我仲帶咗兩包 hammer gel,是 espresso 味,作提神之用,都幾好味咖。

21公里停下來食包gel,聽到靚女義工話:「你地已經一半啦! 係喎,唔覺唔覺原來一半拿,乜完全唔攰嘅!」

起步繼續哎呀,右膝蓋又痛啦! 皇馬都係28畸先痛,點解你今日咁快嚟料咖?!!!

我嘗試忍痛跑,以為慢慢可以唔痛,再諗其他野,分散注意力,又停下來抖抖,但仍然痛!

死啦,仲有一半喎,今日天氣咁好,個速度又咁正……乜我個拾科夢咁快破碎咖!!!

最後我決定減低提膝幅度,出奇地右呀哥又乖乖地啦喎多謝晒,我之後一定比你好好休息咖.

呀哥唔扭計,我又繼續。27公里遇上半馬快腳,好在我都開始攰,佢地都冇乜點阻我!

呢個時候真係好多人,大家都肯跑,速度又差不多. 我非常專注,沒有靠邊找相機,看到相識的朋友在路旁替跑手拍照也沒有和他打招呼,竟然連摩天輪也看不見,完全tunnel vision!

最後跑到糖街,呢個拾科執硬啦。我笑著向前,堅係由心底笑出來. 藍地毯啦,只剩下一百米咋。我把雙手食指放胸前衝終點(當天未起步時想到的11馬甫士),終於以356完成賽事,圓了我的拾科夢!!!

當天honey 336完賽,好在冇跟佢,命都冇呀! 咁以後要改名為拾科級蒲嗎,哈哈!!


二三事

紀律
跑比賽之初,比人爬頭,好唔岔氣,一定要追番人(又冇次追到喎)!!
快腳教路,紀律好重要:用穩定披醒,咪時快時慢!
我每畸留意家明,心無雜念,唔理其他人,專心一意跑步。(你地要過就過飽佢啦!)
之前有跑友一開波跟咗快腳五分披跑,傷及舊患,不但成績差,更從此禁足全馬,絶跡江湖!

堅持
有人話跑馬是堅持 放棄 堅持
我說堅持 堅持 再堅持:無論如何都唔好放棄!
快唔到就慢,跑唔郁就行!
最近某大品牌説堅持是任性,我不同意.
堅持是態度,堅持是信念!
You stop not because you are tired. You only stop because you are finished!

自信
跑步鍛練心志,無論任何天氣環境,
都要對自己有信心,相信自己一定得!
綜觀我前面的百多名女跑手,
大多身型嬌小,但耐力無比,
大家都沒有先天優勢,卻又非常好跑!
我們就是堅守這二三事,才能順利拾科。

後記
跑馬之後例菜機械人mode,以這次的披醒,理應有排痛,但今次又唔係痛好耐。之前跑馬前長課總是比賽前一週,但今次是一月尾,竟然又可以拾科,天氣真是一切嗎?

今次冇揾相機冇擺甫士,抵我一張相都揾唔到,真係一張都冇。我卻異常興奮,打破了跑步最緊要有相的名言呀!

更多:
Fitz.hk Facebook專頁
跑步總有退下來的一天
[渣馬2017大數據] 一張圖睇下自己成績屬百分之幾
[渣馬2017] 我和我的初馬
[用鏡頭參與2017渣打馬拉松] 在銅鑼灣糖街拍攝跑手英姿
Fitz Running 跑步


文章為作者意見,不代表Fitz立場。

歡迎投稿: http://fitz.hk/contribute/

温拎級蒲
自2003年一起跑比賽, 參加過十公里及半馬比賽不下三十個, 間有獲奬. 2013年開始上馬, 至今已完成11隻全馬, 2017渣馬終於拾科. 今後希望繼續開心完走, 長跑長有.