早前英國有傳媒趁住倫敦馬拉松，整理咗馬拉松對人體影響嘅科學研究。報道話，跑馬拉松會令人嘅身體，出現5項變化：
- 身高變矮
英國史雲斯大學話，跑馬拉松會令椎間盤嘅軟骨壓縮，而跑完42公里之後，身高大概會矮1厘米。不過研究人員強調，呢個係身體自然現象，就算唔跑馬拉松，人嘅身高都會越嚟越矮。 - 體重變輕
一場馬拉松可令身體流失4至6升水份，體重會減輕2至3磅。 - 心臟變強
人嘅心臟平常每分鐘輸出4至6公升血液，而跑馬拉松時心臟會比平常跳動多3至4倍。對一位身體健康嘅人嚟講，呢個係一個好好嘅鍛練。 - 記憶變好
美國索爾克研究所發現，跑步過程要不斷計算及記憶。所以有長跑習慣嘅人記憶力較好。 - 吸引女性
劍橋大學有研究話，擅長長跑嘅男人，身體有更多睪固酮。咩嚟？總之就有更好嘅身體，更活躍嘅精蟲，更能吸引女性喎……不過，跑得勁嘅女生又點呢？
圖：Daily Mail (按圖放大)
專家話長跑叻會吸引女性。荷里活型男Matthew McConaughey跑步叻，玩三項都掂，唔怪得咁有吸引力。（People.com）
資料：英國每日郵報
----- 廣告 Ad -----
Sophia
平日打字多過行路，鍾意鍵盤多過跑鞋。成為跑手，全因古語有云：「女仔唔跑邊會靚？」