----- 廣告 Ad -----
上年帶了我女朋友 Gigi 完成第一次100km-逆走100,而佢第一次玩就可以做 sub-24。
見上年Gigi所寫文章:《[逆走100 Rebel Walker] 那些你追隨冒險的夢 我陪你去瘋》
帶著上年開心 sub-24心情,再次挑戰 sub-20,結果會點?
----- 廣告 Ad -----
2016年,我們在山上認識。大家互相認識大家,贊同對方價值觀就走在一起。
當時我比較貪玩,鍾意玩毅行者同定向賽。而佢比較小做運動,無乜運動目標,我就令佢走出comfort zone,嘗試叫佢報10km、逆走100等賽事。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_02.jpg?resize=1024%2C1024&ssl=1)
2017年 Gigi 首次10km賽
諗返起上年,都幾變態! 拍左一年拖既我地就要玩100km痛苦山賽,除左面對完賽呢個挑戰外,我地仲要賭上感情。有玩過100km既朋友就知道,100km 咁長,發生咩事都唔會知道。尤其佢只係玩過揹水一戰外,未玩過任何山賽! 幸好過程當中,我地好了解對方狀況,互相照顧,向住SUB 24目標完賽! 當刻完賽,我感覺放底一舊大石,我地之間感情經得起100km 經得起痛苦!
----- 廣告 Ad -----
第一屆逆走完賽無耐後,Gigi 興奮咁講,想每年都玩逆走100同甘共苦。我係到諗,究竟女朋友被虐到咩地步?
如事者,我地抽毅行者 (抽唔中) 同再報逆走100。但今次一定要快過上一年成績 (23:45)。再次報左逆走100後,因我同 Gigi 因工作關係,無乜機會上山練習,只係一星期夾一晚跑步操斜路,連夜山長課都無做。
我自已比較少比賽練習,相反Gigi玩左幾個賽同反複練習麥三逆走。我亦係呢個時候誇大海口要做 sub-20 呢個挑戰! 我自知有能力做到,但帶住女朋友比上次快多4個鐘,有一定既難度。我地唯有係裝備上著手,只係用腰包裝晒指定裝備。而今次亦幫唔到 Gigi 拎太多野,只可以幫佢拎 poles。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_03.jpg?resize=696%2C696&ssl=1)
最後無拎袋、抽筋噴霧、凡士林、濕紙巾等物資,只靠 naked belt。
終於比賽當日,我前一晚訓得好差操山又少左狀態比上年差好多,懷疑自己可唔可以帶住Gigi 跟 Schedule 去完成?
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_04.jpg?resize=696%2C928&ssl=1)
當然繼續有長頸鹿公仔陪行。
起步時為免同上年一樣塞車上樓梯,所以我地一路跑。由於無做 warm up,起跑都比較辛苦,去到環塘時慢慢拎返節奏。由於只係用腰包跑,整體都跑得好舒服,可以一邊跑一邊諗影相 pose (呢個係我地比賽既目的)。為左捉緊時間,我地方配好工作,去到CP大家需要做咩,我負責裝水,而 Gigi 裝定 Trailwind 同食野。如事者,我地去到扶輪公園比 Schedule 快左20分鐘。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_05.jpg?resize=696%2C464&ssl=1)
有體力時,當然不忘玩一下! 攝: 糖叔@run-pic (Martin Ho)
原定3小時的針草帽逆走,竟然可以2:40就完成! 保持住時間上優勢繼續搵攝影師影相繼續盡力奔跑。好景不常,我竟然去到畢架山前謝晒皮,唔夠訓導致出現大脾抽筋。唯有飲抽筋水上山,繼續每小時食典解丸補充。上到畢架山CP時,比我地預計時間快左差唔多1個鐘,獅子亭 support 未必趕得切上黎。一路作抽筋一路慢跑去獅子亭,好在呢個時候遇到大會既抽筋救星 CRAMPFIX,可以補多1支再上路。
幸好,係我地落到獅子亭前,Support team 比我地早到小小。不得不讚專業又細心既 Supporters,打定熱水準備毛巾俾我地洗面,準備好美食: 自家製鴨湯通粉、栗米蝦餅,同大師級按摩服務! 可惜我飲抽筋水飲到個胃唔舒服,未能夠享用太多美食。舒服咁休息左15mins後,好似換左對腳咁,我重生啦!
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_07.jpg?resize=696%2C928&ssl=1)
連續2年專業細心Supporters – 毅行隊友 Comy、Wilsome、螺絲仔、Derek
上年離開獅子亭時開始入黑落雨,但今年早左好多,時間又好用。最重要,我身邊既暴風女神無啓動佢橫風橫雨既能力!
前50km賺左1個鐘,令我有諗過打入 sub-19 呢個關卡。但只好保持平常心,畢竟逆走100係睇尾50發揮。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_08.jpg?resize=696%2C928&ssl=1)
山上有怪獸係好合理既事! 攝: Clive Choy@運動筆記
逆走麥四都練過1-2次,今次時間都好順好舒服。但去到馬鞍坳時,Gigi 終於感受到生平第一次抽筋,明白個種行唔到既感覺。唯有叫佢飲包抽筋水繼續,希望保持1小時優勢去到企嶺下搵老豆 support。行緊途中,發現自己從來未咁掛住老豆。一到左CP,老豆已經準備好CP烏冬&脆香雞翼,幫我地裝水,變身成為專業按摩師,幫我女朋友換左對腳。
老豆仲特別炮制一支鮮搾檸檬汁 (抽筋及眼訓時用),就係咁不知不覺休息多左5-10mins。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_09.jpg?resize=696%2C522&ssl=1)
御用山賽Supporter – 老豆
去到逆走100重頭節目,逆走麥三。上年我係到開始邊行邊訓教,女朋友亦因路況行得比較慢。但今年係呢個位置大躍進,Gigi 一路作抽筋都可以用2:25完成,麥三畢業啦! 黎到北潭坳搵老友 – 呀岳速遞湯飯同換襪 (攰到唔記得影相)。經過呢兩段路,之前所賺既1小時,慢慢流走,得返45分鐘。只要保持住,我地仲可以做到 sub-20。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_10.jpg?resize=696%2C1020&ssl=1)
少不了招牌心心Pose 攝: Stanley Wong@運動筆記
行左4分3路程,我知道 Gigi 為左我定立既目標SUB 20盡左佢自己最大努力,只要係落斜同平路,佢都默默跑,一句辛苦都無講過出聲。由針山打後,大部份時間都係由Gigi帶住走,讓佢用自已 pacing 完成,廢時我不自覺帶快左。眼見自已女朋友咁攰咁盡力,自己又唔可以做啲咩,唯有出口術講甜言蜜語氹佢開心,係好攰時拖住手拉住佢行慢慢回氣。互相支持,忍住好攰既感覺捱到西灣CP,準備為最後一個大佬做準備! 不得不讚西灣CP義工們,佢地好專業,準備好一張張櫈同我地按摩,一個一個比賽參加者對腳經過佢地雙手都會返生咁,真係舒服到唔想走!
----- 廣告 Ad -----
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_11.jpg?resize=696%2C523&ssl=1)
西灣CP義工們,按腳寶況! 開舖都得呀!
比起上屆,今次做足晒心理準備上西灣山。我地2個心入面不停講粗口一步一步上去,用左差唔多1個鐘先上到去頂。為左做好時間,唔抖就衝落山。去到東霸半夜2點11分,計極都做唔到 sub-19。雖然都想做好靚時間慢跑返終點,但無奈 Gigi 飲完抽筋水都醫唔隻腳。唯有拖住佢慢行,有落斜先慢慢追時間。
![](https://i0.wp.com/fitz.hk/wp-content/uploads/2019/03/逆走100-Rebel-Walker-愛情-vs-100-km_12.jpg?resize=696%2C464&ssl=1)
攝: run-pic
今次逆走100,sub-20 對我嚟講唔易做到。自己體能未去到可以用拖繩帶妳走全程,又唔可以好似上年咁幫妳拎晒所有野。全程由妳帶住我走,前半程要照顧抽筋既我,後半程要你盡力跑剋服路況。沒有妳,我絕對做唔到呢個佳績! 更加估唔到我地憑呢個成績都可以上榜,拎到 MIX TEAM 2 第5名。
好感謝妳在愛情上陪伴住我,又感激你在山上成為一位不可橫缺既伙伴。2年前點會想像到依加既妳可以咁利害跟上我步伐,同我一齊BP,做出一次又一次佳績,好似有妳係身邊,幾變態同痴線既事都完成到。我地又要為下一件瘋狂既事計劃下!
終點呢個擁抱,代表晒我對女朋友千言萬語既感激說話。途中話衝終點想攬住喊,但最後攰到眼淚都出唔到嚟。
至於……下年仲會唔會玩逆走100? 未知呀! 但做 sub-20 真係好痛苦! 但唯一肯定,會繼續帶住 Gigi 走落去,係山上留腳毛! 我地應該會嘗試走出麥徑,試下玩唔同賽事,挑戰我地之間既愛情!
如果想交流跑步、其他戶外活動,可以 follow 我地嘅 Facebook!
https://www.facebook.com/nghoyeah/
特別鳴謝
我地 supporters – 為左幫我地短短15分鐘,勞心勞力付出咁多!
大會 – 好有氣氛又好玩,好出色既安排同紀念品
大會義工們 – 睇得出每一位都付出真心服務我地,幫我地裝水拎食物,成個阿四咁,辛苦晒!
攝影師們 – 謝謝你地每一位幫我地影咁多靚相,留下好多美好回憶。特別係陪我地影奇怪相既攝影師們,我知我地好麻煩,但希望都帶到歡樂俾你地!
Fitz連結: https://fitz.hk/?p=116112
Fitz Facebook專頁
[逆走100 Rebel Walker] 那些你追隨冒險的夢 我陪你去瘋
哭在逆走100km後
Fitz 行山 Hiking