圖: 幸好小弟無累街坊,在「意料之中,情理之內」下奪冠 (All Photo Credit: Yan Yan)

剛剛星期日,在機緣巧合下,小弟有機會伙拍3位神人 Jacky ,Max,Tat Tat,代表 Salomon HK 出戰四葉草接力賽,開跑前其實勁大壓力,因為勁驚累街坊. 而且賽前名單見到有路跑猛人及一隊外國選手。所以內心極度「淆底」心諗: PK la…..輸既話一定輸我…………估唔到跑5km仲大壓力過呢緊27/4 玩 UTMF (環富士山越野賽) 。

圖: 4人接力賽制,分東南西北4loop,分別為10 +7+5+10km 共32km

是次4人接力賽制,分東南西北4 loop,分別為10+7+5+10km共32km,賽前討論後,按各人長處,由於小弟最弱雞當然跑最短既5km,神 Max + 癲佬 Tat Tat 爆炸力最強當然跑最長既10km,神J就耐力及爬升力最強就 handle 最多上落既7km。

圖: 不出所料,當日起步已經見到來勢洶洶的外國選手(中間藍衫)

當日我地4棒次序為 Tat Tat > Jacky > 小弟> Max (10 +7+5+10km)。不出所料,當日起步已經見到來勢凶凶的外國選手,槍聲一嚮佢已經一馬當先。但當時我地3個不意外地坐低食花生,因為我地有癲佬 Tat Tat。

圖: 食下花生先啦……等睇Tat Tat 點樣2:55pace 衝落來.

49分鐘後……Tat Tat 番來了。10km 上落3百幾米,49分鐘衝番來係咪痴線架?

心中暗暗愛上左達達 (….既爆炸力)。 Tat Tat,帶著2分鐘既優勢番來,第2棒 Jacky 亦隨即起步,而第2棒,對手原來是路跑猛人 (有師兄話佢半馬輕鬆1:20內)……當時心中暗暗一驚,心諗如果我跑第2棒就PK……倒輸5分鐘都似!

圖: 癲佬………49分鐘,10km( 3xx m+/-) 心中暗暗說出一句 CLS 架!

38分鐘後,Jacky 回來了……果然不出所料對手堅係勁,將之前我地既優勢追番晒,同 Jacky 叮噹馬頭咁番緊來,當時我勁「淆底」……心諗死啦死啦……!

圖: 等待接棒呢20米路程,心中有無數既「淆底」內心交戰

接過棒後,定一定神………死就死啦,在奶力盡出下,最後 26分鐘完成,慢外國選手分幾鐘。Check 番 Strava,原來 Ching 叫 Thomas Kitwood,係 Action Asia 的短途 podium 常客……當堂安慰番自己,盡左力都追唔到是常識吧……再練下先啦兄弟。

圖: Check 番Strava,Thomas Kitwood,係Action Asia 的短途podium常客

最後一棒,當時落後2分幾鐘,全隊人既希望都落係 Max 身上。當時都有D擔心,理論上,最尾一棒都交付最強身上,Max 既短途爆炸力,應該都係數一數二,我地都希望可以扭轉乾坤!

圖: Max 食粥食飯睇你啦

未夠一小時,站在終點前的我們,見到第一個衝回來的是一名身穿著 S-lab sense tee tank 同s-lab sense short 4 + s-lab sense 6 跑鞋(無錯係hard sell緊gear),仲要口吐白沬的身影出現了……!

Max 真係反 cup 對手,逆轉勝出 ,最後,Max 用左58分鐘,完成最後10km路程。成功反壓對手奪冠,真係要引用黃興桂金句: 神奇,頂級,超卓!

圖: 黃興桂: 神奇,頂級,超卓

最後我地以2小時52分成功奪冠,小弟真係鬆一口氣,好在無累街坊! 衝線一刻,大家都真情流露…………..真係嚇死寶寶!

圖: 我同 Jacky : Max 全靠你(錫啖先)…….嚇死寶寶啦……..wooo wooo
圖: 見到 Max 口吐白沬,証明佢真係奶力都出埋
圖: 最後我地以2小時52分成功奪冠!
圖: 奪冠獎品都係 Salomon,睇下大家幾開心……!

Fitz 文章連結: https://fitz.hk/?p=92616


更多:
Fitz Facebook專頁
[大脾罅救星] 從未如此舒適的短褲仔
[越野跑鞋的GTR] Salomon S-Lab Sense Ultra
[潮流興玩帽] 識襯一定係襯「佢」 (Bike Cap)
[有毒慎入] 識玩,一定要帶女友去玩呢個 (前篇)
[怯~你就輸了!] 一對踏上大賽頒獎台的地球人
壞人 [email protected]
Fitz Running 跑步

廣告
壞人Ryan
八十後,現職某大型連鎖店之營運經理,自2011 首次參與毅行者後,漸漸愛上越野跑。參加過大大小小之香港路賽,山賽 (凡人一名)。講究裝備,正宗『裝備L』 一名。 堅持屎波都要架生多。同時亦熱愛足球, 死忠曼聯迷。