事發地點係呢個運動場 圖: 康文署

有朋友去開運動場跑步,話有跑班要求學員帶住拍子機練跑,對練習步頻甚有幫助。正所謂各有各法,「拍子機練跑大法」有無用唔係今次討論範圍,不過當有人高聲播住拍子機練習,又確實幾影響人:

  1. 跑步係好個人嘅活動,有人鍾意跑步時聽歌,有人鍾意跑步時胡思亂想,不過大家都唔鍾意跑步時被人滋擾。咁大聲播拍子,同大聲播歌無乜分別,同樣討厭
  2. 跑步節奏人人唔同,你夾硬逼成個運動場嘅人聽你嘅拍子,擾亂人哋跑步節奏,就係一個自私行為
跑步時要被逼聽住一個唔同你節奏,就好似聽住唐三藏唱歌

當然有人可以反駁,呢個行為無犯法,無違反運動場規則。OK, fine,不過運動場跑道一字排開慢步,亦無違反規定;逆線跑步又無被管理員阻止,咁大家係咪覺得無問題呢? 影響到人就係影響到人,做事唔應該騷擾到他人,呢啲叫「自重」。

香港某連鎖琴行買到嘅拍子機

識得用其實好好用

講番拍子機,一般琴行賣緊一百幾十蚊一部,用法似舊式收音機,有耳機插口 (3.5mm),戴番個耳機就唔怕你嘅拍子嘈到人。就算無帶耳機出街,亦可以較大細聲。請將聲量收細,please!

驚大家唔識用,整理埋圖示

平時運動場閒閒地百幾二百人跑緊步,唔顧及其他人感受就大家都輸,何必呢?


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。