[運動場事件簿] 拍子機練跑大法 煩音好滋擾?

有朋友去開運動場跑步，話有跑班要求學員帶住拍子機練跑，對練習步頻甚有幫助。正所謂各有各法，「拍子機練跑大法」有無用唔係今次討論範圍，不過當有人高聲播住拍子機練習，又確實幾影響人:

1. 跑步係好個人嘅活動，有人鍾意跑步時聽歌，有人鍾意跑步時胡思亂想，不過大家都唔鍾意跑步時被人滋擾。咁大聲播拍子，同大聲播歌無乜分別，同樣討厭
2. 跑步節奏人人唔同，你夾硬逼成個運動場嘅人聽你嘅拍子，擾亂人哋跑步節奏，就係一個自私行為

當然有人可以反駁，呢個行為無犯法，無違反運動場規則。OK, fine，不過運動場跑道一字排開慢步，亦無違反規定；逆線跑步又無被管理員阻止，咁大家係咪覺得無問題呢? 影響到人就係影響到人，做事唔應該騷擾到他人，呢啲叫「自重」。

識得用其實好好用

講番拍子機，一般琴行賣緊一百幾十蚊一部，用法似舊式收音機，有耳機插口 (3.5mm)，戴番個耳機就唔怕你嘅拍子嘈到人。就算無帶耳機出街，亦可以較大細聲。請將聲量收細，please!

平時運動場閒閒地百幾二百人跑緊步，唔顧及其他人感受就大家都輸，何必呢?