[運動場事件簿] 足球比賽期間 跑道人數上限僅75人 跑步人士要大排長龍

斧山道運動場，市民排隊入場跑步 攝: Bonnie

讀者報料，6月22日星期一，斧山道運動場黃昏7點已經有幾十位市民喺場外排隊，等候進入運動場練跑。疫情之下，康文署規定運動場入場人數上限為200人，但球場於6月20日重開後，就修改成以下規定:

1. 無人租用草地足球場時，跑道最多可容納200人
2. 有人租用足球場時，跑道人數上限為75人

6月22日呢一晚，跑步人士大排長龍，據聞有人差不多要等一小時，先可以順利入場跑步。

攝: Bonnie

22人踢波點解要犠牲125人?

防疫為社會重中之重，所以運動場限制入場人數，無得否定。不過，運動場緩跑徑需求甚大，唔少運動場晚晚都有人龍。當局又會唔會嘗試去了解問題並加以改善呢?

75人呢個數字如何得出，坊間不少人認為與現行政策有關。疫情與否，每逢運動場之草地足球場被租用，康文署都會以安全為由，只開放最週邊三條線道。疫情之下，運動場入場上限為200人，如果以斧山道運動場8條線道計算，200 ÷ 8 即等於每條線平均可供25人使用，開放三條線道，即等於 3 x 25 = 75人。這個計法，當然未獲官方證實，但以政府官僚作風，相信機會不低。

就康文署運動場嘅防疫措施，我哋覺得有幾點值得當局考慮:

1. 放寬入場上限

政府早前已放寬「限聚令」，室內容許聚集人數由8人增加至50人，咁室外運動場200人上限，係咪可以提升?

2. 減輕封場影響

足球比賽最多只得22人比賽，大家明白「只開放最週邊三條線道」係基於安全考慮，但呢個做法究竟有無科學依據，又或者可唔可以封少啲呢? 如果真係墨守成規咁用「200 ÷ 8 x 3」去計算入場人數，又係咪考慮過實際情況，急市民所急呢?

去運動場跑步，大家其實都係想強身健體，無形中更可減輕醫療系統壓力。有關當局真係要檢討下現有措施，以照顧市民為大前題，令大家都有個健康生活。