電影《志明救春嬌》中的趷趷剛

大家好,呢兩個月好忙,忙到連寫下嘢嘅時間都冇,但尋日喺長跑網有單笑料食到成地花生,搞到花生價格長時間維持喺二百幾蚊一斤,所以今日想同大家分享一下!

跑步與溝女

話說呢位師兄不斷咁喺長跑網 add 其他師姐約跑啦,又會叫其他師兄介紹啲師姐比佢。其中 烈陽教主 都係佢嘅目標。但最好笑係佢問教主鍾唔鍾意跑步,嘩大佬呀,教主係神級院友,動不動都走去跑7、80k喎,你問呢個問題前都做下功課先啦。咁同問一個喺沙漠就嚟渴死嘅人想唔想飲可樂有乜嘢分別呢?我心諗其實你係嚟「約跑」定「約炮」咖?你有冇咁肚餓呀?根據我非科學化嘅統計,佢嘅成功率應該相當低,原因有以下兩點︰

1. 佢FB最多都好似係跑過4.2km咁大把,我唔係想表示長跑網唔會歧視跑得少嘅人,但嗰度啲師姐個個都唔係跑全馬就超馬,仲要個個快到好似風咁,我怕佢約咗出嚟連啲師姐燈尾都見唔到。

烈陽教主



2. 佢唔付出就想有收穫。根據受害者嘅口供,佢曾經想問該位師姐送一塊完賽獎牌比佢,呢下先至係最大死因,佢其實知唔知到啲完賽牌對每一位跑手有幾重要呀?每一塊完賽牌背後都一個可歌可泣的故事,每一塊咬開都有血有汗,用好多時間練習同努力換取返嚟咖,所以呢個係佢最大嘅死因!

其中一塊令呢位師兄垂涎的猛龍慈善跑完賽牌。

其實我好明白呢位師兄嘅心態,因為愛運動的女生都是最美的,所以佢想喺跑谷溝女都係無可厚非的,但女並唔是咁溝的,我強烈建議呢位師兄努力練跑,當你功力深厚時,啲單身靚師姐自自然然會比你吸引到架啦!

P.S.啱啱有人問我乜嘢係趷趷剛?大家去睇志明救春嬌就會知咖啦!XDDDDD

(圖片為編輯所選)

更多:
Fitz.hk Facebook專頁
[親身實證] 唔跑唔知身體好!
[親身實證] 變都樣埋 當阿Bob遇上森美
跑比賽 要知道的二三事
[日本三連馬之一] 京都馬,終於成功完走
Fitz Running 跑步

分享
路加利
由一個超過二百磅的死肥佬,一公里都跑唔郁,到而家一百五十幾磅,跑咗幾次半馬,幾次全馬,一次57公里圖騰跑。透過跑步認識咗好多唔正常的院友,亦希望透過跑步去影響身邊所有的人要注意健康。 聯絡:[email protected]