大陸長跑比賽有人出術走捷徑，已經唔算係新聞。不過日前舉行嘅北京馬拉松，號稱施行「史上最嚴」防疫措施，仲要喺國家首都、天子腳下舉行，斷估唔會有選手咁猖狂啩。點知，內地有心水清嘅網民憑住蛛絲馬跡，揭發一宗選手疑似出術個案。
呢名網民見到跑手編號 E0879 嘅選手，多次出現於約4小時完賽跑手附近，好奇驅使查證後，發現多個疑點:
- 上官網查證，發現 E0879 完賽時間大約4小時15分，以呢個身型及跑步姿勢，應該幾難做到
- E0879 喺唔同步速嘅選手之間出現。有啲喺跑5個幾鐘，有啲係4個幾鐘，出現嘅時機好唔合理
- 經計算，到達27公里位置時，配速約為5分12秒
其他網民對於呢位仁兄嘅推斷，有支持有懷疑。有人覺得唔應該單憑外表就話人跑得慢，亦話上面呢啲只係憑空聯想，唔可以作出判斷。有人甚至話佢跑咗7公里就放棄，佢只不過去終點打卡。最奇怪就係，經過網民激辯之後，E0879 嘅成績喺官網消失，又代表咗啲咩呢?
資料: 搜狐
