美國有個 Club 叫 “50 States Marathon Club”，成員都要去勻美國50個州，每個州至少跑過一場馬拉松。現時呢個 Club 只有1,800個會員，創辦人 Lois Berkowitz 豪言:「入呢個會嘅難度，比成功攀登珠峰更難!」
來自佛羅里達州，今年80歲嘅 Bob Sielski，早前於夏威夷以7小時11分完成檀香山馬拉松，同時集齊美國50個州嘅馬拉松，可以加入 “50 States Marathon Club”，因為佢自小住喺沙灘附近，所以一直都鍾意游水同踩單車，直到40歲左右，開始喺冬天慢跑以保持健康身體。
「我從來都無要求要跑得幾快，我由50英尺開始跑，結果跑到可以參加10公里賽。」
1987年，Bob 參加人生第一場馬拉松比賽，開始佢嘅跑步人生。不過直到2010年，當佢搬去加州之後，先至第一次去美國其他州份比賽。經過十多年後，佢終於喺2021年完成咗48場不同州份嘅馬拉松，到佢完成2021年阿拉斯加馬拉松後，佢剩番夏威夷一場比賽，最後亦順利完成。
Bob 跑咗差唔多40年，佢從來唔係同人鬥快:
「年紀越大，跑得越慢。好多人以前跑第一，後來只能跑第10，就會選擇放棄。不過我會選擇繼續跑落去，如果我只能跑包尾，我亦會接受。」
Bob 話試過參加5公里賽事，佢畀一位5歲小朋友爬頭，佢仲覺得超級開心㖭。佢決意要跑到100歲，跑到唔郁得為止。
Bob 完成美國巡迴之旅，之後會征戰海外，今年4月會去英國參加倫敦馬拉松。
資料: Florida Today
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。
